(AP) — Diabierna un corte a impone sentencia maximo di Panama, 50 aña di prison, na siete miembro di un culto cu a asesina un muhe y seis mucha den un ritual religioso den un parti remoto di e nacion Centro Americano.
E corte na provincia Bocas del Toro a sentencia dos otro miembro di e culto ‘La Nueva Luz de Dios’ cu 47 aña di prison cada un.
E culto a opera pa alrededor di tres aña den bario Ngabe Bugle di El Terron riba e costa Caribense di Panama, pero e residentenan a bisa cu a cambia despues cu un miembro tabatin un vision bisando e pastornan cu nan a keda ‘ungido’ pa extermina esnan no creyente.
Dia 13 di januari 2020, e grupo a manda yama un cantidad di residente na su iglesia pober di palo. Un di e 14 persona rescata di e iglesia e siguiente dia, Dina Blanco, a bsia cu el a bay cu su yiu muher di 9 aña di edad, ken tin epilepsia, su yiu homber di 15 aña y su tata. Na momento cu nan a yega, a bisa nan pa no habri nan wowo, wanta man di otro y resa. “Mi a sinti algo dal mi cabes, y despues mi no sa kico a pasa cu mi”, el a bisa AP aña pasa. “Mi a cay na mi rudia.”
Autoridadnan ta bisa cu miembronan di e culto a usa Bijbel, garoti y machete pa dal e congregantenan, algun di ken a wordo forsa pa kita paña y cana riba candela.
E mortonan ta inclui yiu muher di Blanco, su bisiña kende tabata na estado, y seis di e yiunan di e muhe. Nan curpa a ser poni riba hamaca y benta den un graf comun recien coba den santana di e bario.
E village di alrededor di 300 persona ta mas tanto desconecta di e mundo exterior. Residentenan mester cana varios ora riba camindanan di lodo pa yega na boto cu por transporta nan door di un riu na otro villagenan cu tin electricidad, telefon, clinica di salud y presencia di polis.
