(EFE) – Ministerio di Salud (Minsa) di Panama diamars ultimo a informa cu “den proximo dianan” ta bay firma un convenio cu organisacion Mediconan di Mundo-Francia (MMD-Francia) pa duna atencion sanitario na migrantenan na Darien, un apoyo cu ta cubri e espacio laga pa Mediconan Sin Frontera (MSF) e cual no a renoba nan contract pa diferencianan cu autoridadnan Panameño.
“Entre maart y april nos a notifica formalmente un comunicado di prensa cu nos lo ta bay haci un convenio cu Mediconan di Mundo di Francia, e convenio ey mester wordo firma diabierna awor,” un fuente di Minsa cu a pidi pa keda anonimo a bisa.
El a sigura cu “e convenio ta casi cla” y aunke no ta conoce su duracion, nan ta wardando ricibi e luz berde di Asesoria Legal pa firma “den proximo dianan.”
Entrada di organisacion Mediconan di Mundo na Darien ta supone un apoyo importante pa proporciona atencion sanitario na centenares di migrante cu ta crusa e selva diariamente, e cual ta e frontera entre Panama y Colombia, na unda mester atravesa riunan of nan ta bira victima di robo, abuso sexual of atakenan di bestia salvahe.
Actividadnan di MSF na Darien a ser suspendi pa Gobierno Panameño na comienso di maart, despues cu un convenio bilateral a caduca y e NGO a denuncia un aumento grandi di abuso sexual di migrantenan den e selva.
Cu a cifra record di mas di 520.000 migrante atravesando Darien na 2023, MSF a denuncia cu tabatin por lo menos, 676 victima di violencia sexual den e selva cu a haya atencion medico integral di NGO aki, tambe a agrega cu na januari ultimo solamente a registra 120 caso mas “ta un acto di violencia sexual cada tres ora y mey.”
E fuente di Minsa diamars ultimo a ripiti e argumento contra MSF, ken “a viola of no a cumpli cu algun normanan cu tabata den e convenio” cu a caduca na december, manera e necesidad di presenta rapportnan prome cu lo a bira publico.
Ademas, den e caso di violacion, a acusa NGO cu ora e victimanan tabata notifica abuso sexual “ya caba nan no tabata na e pais pasobra nan no tabatin interes pa nan caso wordo investiga, sino cu nan kier a sigui nan caminda.”
Esaki tabata cay den mal tera pa Ministerio Publico e cual a pidi cu “si un hende tabata bisa cu a wordo abusa sexualmente na Colombia of Panama, mester wordo denuncia na autoridad competente,” pero nan tabata denuncie laat y no tabata aporta pruebanan of nombernan, solo un cifra, el a splica.
“Awor nos ta sigui traha na Darien, aunke ta falta man pa yuda, esey ta un realidad y nos no ta nenga cu nos tin mester di Mediconan Sin Frontera, sino cu ciertamente e convenio tabatin su clausula y mester respeta esey, pero ta sigui trahando cu Cruz Cora, cu a reforsa su personal medico y cu otro organisacionnan manera Unicef.” E fuente a indica.
