Panama lo impone restriccion pa realisa comprasnan na tur e pais durante festividad di fin di aña, despues di un aumento acelera di contagio pa coronavirus y pa via di e situacion cu hospitalnan ta biba na e pais.
Autoridadnan sanitario diabierna ultimo a bisa cu e nacion den total ta acumula un total di 206.310 caso positivo di coronavirus, di e cual 3.504 a fayece, un dia despues di kibra e record di infeccion y mortonan pa dia.
“Desde dialuna 21, cu obhetivo di reduci e mobilidad, e comprasnan lo realisa pa genero” Minister di Salud, Luis Sucre den un mensahe na television, ripitiendo un sistema cu ya a wordo utilisa caba na e pais.
E funcionario a splica cu e dianan 21,23,28 y 30 di december hende muhe lo por sali pa haci comprasnan, mientras cu hende homber lo por haci 22,24,29 y 31 di december. El a agrega cu pa Pasco y Aña Nobo e cuarentena lo ta total.
Na juni, autoridadnan Panameño a impone restriccion pa mobilidad di genero y pa number di cedula di identidad, sin cu strategia lo por evita un aumento di caso di contagio.
Gobierno di Panama a reporta diahuebs ultimo 3.348 caso nobo conoci di Covid-19, e enfermedad causa pa coronavirus, ademas di 42 morto relaciona cu e brote, e cifranan diario mas halto durante pandemia.
Director di Provision di Ministerio di Salud, Yelkis Gill, a afirma cu, pa via di aumento di hospitalisacion den sala regular y di cuido, “sistema di salud ta na un punto critico”.
