Secretario di Siguridad Nacional Mericano a bishita un campo den selva Panameño diabierna, cual ta cas na centenares di migrante cu a sobrevivi e crusada di frontera dificil for di Colombia, usualmente na caminda pa Merca.
Kevin McAleenan a yega den un SUV na Penitas poco despues di merdia, y a ricibi informacion tocante operacion di e campo y e condicion fisico di esunnan cu a crusa e region conoci como Darien Gap. E no a interactua cu e migrantenan, kende ta bin principalmente di Haiti, Cuba y Africa, como tambe algun nacion Asiatico.
Autoridadnan Panameño a mira un aumento di migrantenan pasando a traves di Darien e aña aki, cu mas di 16,000 persona cu a haci e biahe di varios dia riba pia e aña aki. Ta un luga sin caminda y sin ley, unda storianan ta abundante di migrantenan sufriendo di robo, acoso sexual of asesinato durante e biahe.
Alrededor di 500 migrante actualmente ta den e campo na Penitas, significantemente menos cu lunanan anterior. Hopi di nan a bisa cu nan no tabata na altura di bishita di McAleenan, y ora el a yega cu Minister di Siguridad di Panama, Rolando Mirones, escolta pa Polis di Frontera, e migrantenan a keda sinta den cas di habitantenan di e pueblo cu aparente indiferencia.
Tin un atmosfera di insiguridad na e campo desde cu transporte for di Penitas na e frontera cu Costa Rica a keda suspendi por lo pronto, sin splicacion di autoridad Panameño.
Algun migrante a bisa cu nan tabata spera di sali pronto pa algun luga sigur unda nan por traha, sea Merca of no, mencionando Mexico como posibilidad.
Bishita di McAleenan a yega riba e ultimo dia di un trip di tres dia na Panama, den cual el a reuni cu oficialnan di Centro America y Colombia pa discuti strategia pa frena migracion iregular den e region.
Diahuebs, oficialnan a acorda pa reforsa control migratorio y di frontera pa combati trafico humano.
McAleenan tambe a bishita un monumento na honor di Polis Fronterizo Panameño cu a perde nan bida, bayendo despues di lunch bek pa Merca.
