(DW) – Diabierna di siman pasa, un tribunal di Panama a absolve 28 persona acusa pa e caso ‘Panama Papers’, e leakmento historico di documentonan di oficina di abogadonan Panameño Mossack Fonseca, e cual a vincula varios personalidad rond mundo cu labamento di capital, segun e Organo Hudicial (OJ) a informa.
“Hues segundo likidador di Causa Penal, Baloisa Marquinez, a absolve 28 persona acusa di delito contra orden economico den e modalidad di labamento di capital, den e causanan di e casonan denomina Panama Papers y Lava Jato, cu e firma di abogadonan Mossack Fonseca y su colaboradonan, asina como ciudadanonan di nacionalidad Aleman,” OJ a informa den un comunicado.
Den e sentencia, e hues a señala cu Panama Papers a determina cu e pruebanan recolecta di Mossack Fonseca, cu evidencia electronico cu a ser aporta den e proceso “no ta cumpli cu e cadena di custodia, asina como cu e principio cu e prueba digital tabatin mester tabata carece di balor ‘hash’ (algoritmo matematico pa transforma blokinan di dato) cu lo permiti verifica e autenticidad y integridad.”
Ademas, e husgado a conclui cu “e resto di e pruebanan no ta suficiente pa por determina e responsabilidad penal di e acusadonan, tanto di fondonan procedente di Alemania como di esun di Argentina.”
Hues Marquinez a decreta “suspension di accion penal debi na e morto di un di e acusadonan den proceso aki,” ta trata di abogado Ramon Fonseca Mora, hefe y co-fundado di e marca di abogado Mossack Fonseca, ken a fayece 9 di mei ultimo pa via di un neumonia, segun su famia a bisa.
Di mesun manera a ordena e eliminacion di medidanan cautelar personal cu tabatin contra tur acusado, entre cual tabatin e abogado Aleman Jürgen Mossack, co-fundado di e firma hunto cu Fonseca Mora. Mossack a ser absolvi di tur acusacion.
Den e caso di Lava Jato, e veredicto ta indica cu “no por a determina e entrada di placa di fuentenan ilicito, procedente di Brazil, na e sistema financiero Panameño cu e fin di sconde, disimula of yuda evita e consecuencianan huridico di e delito precedente.”
E caso Lava Jato di Brazil a ser acumula den e mesun file cu e caso di Panama Papers, debi na similaridad di e acusadonan y hechonan investiga pa Fiscalia. E investigacion pa e caso aki a cuminsa na 2016 “pa hechonan noticioso relaciona cu operacion Lava Jato na Brazil, cu presuntamente tabata vincula un oficina di abogadonan na Panama dedica na operacion di sociedadnan anonimo.” Manera OJ a recorda.
Di su banda, e huicio di Panama Papers a cuminsa 8 di april 2024, ocho aña despues di e leakmento historico di documentonan di e oficina di abogado Mossack Fonseca, e huicio aki a conclui 19 di april ultimo, pero hues a tuma un plaso di 30 dia cu ley ta permiti pa duna su veredicto den caso investiga pa Ministerio Publico. E proceso aki ta componi pa 837 tomo cu 427,000 blachi.
