Panaderia Moderna a invita ciudadano cu a keha riba restonan di raton den pan

Algun dia atras manera cu nos a publica, un ciudadano a post un potret riba su Facebook kehando over di un pan di Panaderia Moderna cu aparentemente restonan di raton den dje. E panaderia en cuestion a invita e ciudadano pa revisa e localidad y dialoga riba kico por a pasa.

Den nos publicacion anterior nos a menciona cu e doño di Panaderia Moderno a indica cu ken cu ta por habri e pakinan di pan y hinca cosnan den dje.  Pa motibo di e tipo di seal cu e pakinan aki ta uza. Esaki ta un di e argumentonan cu gerencia a comenta na Bon Dia lamentando cu algo asina por a pasa. Pasobra segun nan ta imposibel cu for di e fabrica e pan lo a sali asina. “Specialmente si un hende lo kier daña nomber di compania”, e doño a bisa Bon Dia.

Inmediatamente manera cu e ciudadano a post riba Facebook cu tin restonan di raton den un saco di pan di hotdogs di Panaderia Moderna, el a keda acerca por medio di gerencia. Nos a comunica cu e ciudadano Sandy Escoto Mateo kende despues a kita e post for di su Facebook y bisa nos cu e no kier causa daño of mal nomber na e compania. E ta bisa cu esaki nunca tabata su intencion. Nos a puntr’e si el a cambia su mente y si locual el a post prome no tabata corecto y/of no tabata trata di restonan di di raton. Pero e ciudadano ta bisa nos cu e no kier comenta nada mas riba esaki indicando cu e no kier mas publicidad negativo pa e negoshi. El a bishita e localidad y constata cu ‘e luga ta limpi y higienico’, asina e ta bisa Bon Dia.

Sr. Mateo ta bisa tambe: “Mi a bay wak e luga y constata cu Pest Control mes ta bay nan luga pa spuit regularmente, nan tin e luga desinfecta tur caminda.” Nos a puntr’e  tambe si el a keda den un manera of otro menasa cu lo tuma pasonan huridico contra dje pa motibo di su post. El a contesta: “No, absolutamente cu no.”  E ta bisa cu el a wordo trata hopi bon pa gerencia di e panaderia cu a mustr’e e bishitanan cu Departamento di Salubridad ta haci eynan regularmente.

Unda tambe nan ta cumpli cu tur rekisito di e departamento di Salud, segun e panaderia ta menciona na Bon Dia. “Panaderia Moderna ta conoci pa su clientela pa mas cu 85 aña. Servicio ta importante pa Panaderia Moderna. Nos ta invita pueblo pa por tuma contacto libremente cu e gerencia di Panaderia Moderna si nan tin cualkier pregunta.”