Despues di 18 di aña e tienda conoci pa su ‘beach wear’, esta Panache, lo cera su porta den Caya di Betico Croes. Motibo ta cu nan a mira e negoshi bay atras y no tin mucho cliente compara entre otro cu otro areanan. Nan tin un tienda ainda na Palm Beach Plaza cu si ta keda habri.
Bon Dia Aruba ya a publica structuralmente riba e desaroyo den Caya Grandi unda comerciantenan ta kehando riba e falta di publico. Gobierno a tuma varios decision, entre otro habri e caya bek pa trafico durante cierto orarionan. Sinembargo esaki te ainda no ta dunando e resultado principal pa comerciantenan lo keda, esta hisa nan benta. Un otro factor cu ta hungando un rol ta e mallnan cu nan a keda lanta na Aruba. Esaki ta crea hopi competencia cual por mira mas y mas e efectonan negativo pa e centro di Oranjestad.
Luga Nobo
Doño di Panache sr. Suresh Mirchumal ta bisa: “Cada luna e ta birando mas y mas drastico. E benta ta cayendo mas y mas pa luna.” Panache a dicidi pa cera e localidad den Caya anto agrega e inventario hunto cu e negoshi cu nan tin na Palm Beach cual ta bay bira e ‘main branch’. Tur empleadonan (6) cu a traha na e localidad na Playa ta bay bini Palm Beach pues el a segura cu ningun empleado ta perde nan trabou. Nan ta bay habri un luga nobo tambe na Palm Beach cu lo yama ‘The Islander’, un concepto totalmente nobo. Sr. Mirchumal ta bisa cu e djis no tin otro opcion anto e mester saca su negoshi for di Caya Betico pasobra no tin benta.
