Palmaruba Condominiums a tuma contacto cu Bon Dia Aruba despues di nos publicacion tocante e awa cu a pega na Palm Beach dilanti di Valero despues di e awasero torencial. Segun Palmaruba Condominiums, nan a cumpli cu tur exigencia di DOW pa por construi na e area aki pa percura cu e fluho di awasero tin su caminda di bay pero e problema di awa tog ta keda persisti. tabata tin varios comentario cu e edificio di palmaruba condos por a hunga un rol den stroba e awa di sigui core su caminda na Palm beach
Na prome luga, pa por a construi un edificio manera Palmaruba Condos na Palm Beach den e area cu e ta, tabata tin algun exigencia di DOW cu nan mester a cumpli cune. Sr. Hugo Iglesias, Proyect Manager di Palmaruba Condos, ta bisa Bon Dia Aruba cu: “Na cumisamento di e proyecto ora cu nos a bin cu e idea di desaroyo riba e proyecto na DOW, un di nan exigencianan principal tabata ta e solucion pa e maneho di awa cu ta acumula den e area cu a haya hopi problema.”
E propuesta como solucion for di DOW tabata e construccion di un ‘ditch’ cu ta core den e perimeter di e proyecto. Prome cu a cuminsa cu e construccion di e fundeshi di e edificio mes, Palmaruba a wordo instrui pa construi e ‘ditch’ como e prome fase. Esaki a wordo coordina diferente biaha cu DOW anto representantenan tabata bin controla e construccion aki y ora cu esaki a termina, a procede e ora pa construi e fundeshi di e edificio. E ‘ditch’ aki tin un hanchura di 5 meter anto un haltura di mas cu 2.4 meter. E midi di e ‘ditch’ aki a wordo calcula door di DOW anto segun Sr. Iglesias, esaki ta locual DOW a bisa tabata necesario pa conecta cu e maneho di awa cu tin. Hopi hende a pensa cu e edificio aki a wordo construi sin tuma consideracion di e maneho di awa anto inverti y construi den un duiker manera esun cu nan tin. Aparentemente, a tuma esaki bon na cuenta y a haci un inversion grandi riba dje.
Inversion di mas cu 1 miyon
Construccion di e duiker aki su so a costa un inversion di 1 miyon florin segun Sr. Iglesias ta bisa Bon Dia Aruba. E awasero ta trece cune un combinacion di lodo, sushi y piedranan chikito anto esaki segun opinion di Palmaruba Condos, tabata e motibo pakico e awa den nan duiker tabata na un nivel mas abao di locual tabata yenando nan dilanti. “Pasobra e awa no por a sali door di e sushi den e drenahenan anto den e prome laba a bin un cantidad grandi di palo, mata, sushi y despues ta sigui trece mas cual ta sigui acumula y na dado momento e awa no tin luga mas pa move,” Sr. Iglesias ta bisa. Tin algun sistema di drenahe cu ta situa na Valero Palm Beach mes y den e area cual ta chikito y tabata pega cu sushi.
Ta berdad cu un cantidad di awa inespera a cay siman pasa pero e awa a tog bay riba e mesun dia anto e no a keda pega pa dianan largo eynan cual por a bira un problema mas grandi. Sin embargo, ni cuanto placa a wordo inverti pa traha e duiker aki na e tereno di Palmaruba Condos pa yuda cu e fluho di awa, esaki obviamente no a yuda e awa bay su caminda mas lihe manera debe ser.
E inundacion aki tabata uno cu a causa basta daño den e area aki di Palm Beach.
Un funcionario di DOW a reuni cu Palmaruba Condos anto a bini hunto pa dialoga na con por haci cu e awa ta bay mas lihe anto evita pa e sushi tapa e drenahe.
“E funcionario a bisa cu nan ta bay dialoga esaki cu su hendenan pa implementa un solucion cu ta bay conecta mas eficientemente e area cu a wordo yena cu e ditch cu ta pasa bao di nos propiedad,” Sr. Iglesias ta bisa.
Analisis pa haci cambionan y coreccion
Segun Sr. Marlon Croes, Director di DOW ta splica Bon Dia Aruba: “Tabata tin diferente desaroyo cu a tuma luga den e ultimo añanan cu nos tin cu bay inventarisa. Nos a sinta na DOW cu e afdeling cu ta planifica y nos ta bay determina henter e area di fluho di awa na Palm Beach, midi e capacidad di tur rooi cu tin existente pa wak unda e problema a surgi pa cuminsa analisa y bin cu proposicionnan nobo hunto cu un prijs su tras pa nos presenta gobierno anto mehora e fluho di awa den e areanan aki.” Despues cu Bon Dia Aruba a bolbe haci Sr. Croes e pregunta cu si tin posibilidad cu construccion di e edificio aki por a stroba e awa di sigui core den e area aki, Sr. Croes a contesta cu: “E por ta asina, pero e condominium tin un baki bao di dje pa e awa core cual ta relativamente grandi. Kiermen e porta eynan, porta otro caminda. Nos tin cu analis’e bon pasobra nos a ricibi 70 milimeter di awasero den cuater ora anto esey nos tin cu bay simula pa wak unda nos tin cu bay coregi of haci cambionan.” E edificio mes a wordo construi riba un nivel mas halto, sin embargo e awa a hera yena te paden di e edificio si awasero lo mester a yobe un paar di ora mas segun Construction Manager Sr. Arturo Parra. E duiker cu a wordo traha ta completamente di beton, e tin su camindanan pa e hala rosea, a cumpli cu tur rekesitonan di DOW anto e ta termina unda cu Palma Real ta cuminsa mas pariba. Basa riba combersacion cu Sr. Parra, experto den construccion y kende a traha riba e duiker aki na Palmaruba Condos, Bon Dia Aruba por a tuma nota cu tanten esaki no wordo soluciona, e chens ta hopi grandi cu por tin un otro inundacion si otro awasero torencial mester pasa over Aruba. Director di DOW como tambe minister di Infrastructura ta bisa Bon Dia Aruba cu nan ta bay analisa e situacion hunto cu Palmaruba Condos pa mira unda mester bin cambio of coreccion cu mester wordo haci.
