Dialuna mainta un turista a hera hoga na Palm Island. Segun ekipo di siguridad di Palm Island, algun turistanan a stroba procedura di rescate di nan personal.

Dialuna pasa di 10:30 di mainta alarma a keda activa na Palm Island unda un turista femenino a bira malo den lama na momento di snorkel. Personal di Palm Island a saca e dama for di awa kende a guli basta awa. Akinan a cuminsa cu reanimacion y a raporta na autoridad. Paramediconan a yega un rato despues anto subi e boto bay direccion di e isla pa sigui cu e parti di reanimacion.

Turista enfermero
Bon Dia Aruba a ricibi un mensahe riba nos pagina di Facebook for di un persona cu ta bisa cu no ta tur cos cu a pasa e dia ey a sali den noticia. E persona ta splica cu el a nace na Aruba y ta actualmente biba na Hulanda anto a identifica su mes como un enfermero (actualmente trahando manera ‘kinderverpleegkundige’). E ta bisa cu el a caba su estudio na Hulanda hopi tempo pasa anto tabata riba vakantie na Aruba e siman aki.  E tabata na Palm Island un rato hunto cu su mayornan ora cu esaki a pasa y a pone riba su pagina di Facebook cu: “Ora nan a saca e curpa tur hende tabata wak sin haci nada. Ami a cuminsa cu reanimacion y despues mas hende a bin yuda. Entre esakinan tabata un otro turista Mericano cu experiencia medico.”

E ta bisa cu despues di 20 minuut di reanimacion, e paramediconan a yega. E turista enfermero – cu ta prefera di no divulga su nomber – ta bisa cu e personal di Palm Island a saca e dama for di awa pero nan a drenta den panico y no tabata sa kico pa haci despues.  E ta bisa Bon Dia Aruba cu: “Ningun caminda a sali cu otro hendenan a yuda rescata e persona aki durante un reanimacion pisa di 20 minuut.” E enfermero ta conclui cu e ta contento cu a rescata e dama pero ta lamenta cu personal di Palm Island a faya den e parti di reanimacion. Riba rednan social a surgi algun comentario cuestionando credibilidad di e personal di Palm Island a base di e sucedido aki.


Reaccion di Palm Island
Amy Spagnola ta encarga cu e ekipo di siguridad na Palm Island. E ta un ‘Emergency Medical Technician’ certifica cu mas di 20 aña di experiencia den prome auxilio y rescate. Sra. Spagnola tambe ta un ‘Safety Officer’ pa e compania anto e ta train e personal regularmente. E ta bisa Bon Dia Aruba cu nan personal sa di e procedura  anto nan tur ta certifica. “Nos ta traha cu protocol anto e dama aki ta bisa cu e ta un nurse pero no a demostra un prueba di esey. Den mi rapport di loke a pasa dialuna merdia ta para cu e personal no tabata mucho contento cu e personanan cu a bin yuda. Esaki pasobra nan a interveni cu procedura y cu nos responsabilidad cu nos tin cu nos clientenan.”

Cuater miembro di personal a saca e dama for di awa anto tin un procedura pa sigui despues di esey.” Bo ta check nan rosea, bo ta wak si nan tin pulso anto yama autoridad. E personal a haci tur esaki debidamente. Nan a cuminsa CPR anto adicionalmente nos tin un Automatic External Defribillator (AED) cu nan tambe a uza. Pa ora cu ambulance a yega 20 minuut despues, nos a logra haya un pulso bek pa e dama”, sra. Spagnola ta splica.

Intervencion di procedura
Segun sra. Spagnola, e ta fastioso pa nan como tambe personal di ambulance ora cu un persona purba di interveni den procedura medico. Den casonan manera esaki bo mester haci dos minuut di CPR anto despues switch pa “test compression” pa evita cu e persona bira malo. Segun procedura di American Heart Association y American Red Cross – cual ta procedura cu Palm Island tambe ta certifica den dje – ora un persona tin atake cardiaco anto bo no actua rapido, bo tin menos cu 8% di chens pa reanima nan. “Nos ta hopi orguyoso di nos personal. E dama ta na bida pa motibo cu nan a actua lihe y debidamente. E resultado por tabata pio.”Sra. Spagnola ta conta Bon Dia Aruba di un sucedido di algun aña pasa unda cu un persona a interveni procedura medico cu resultadonan fatal na Holiday Inn. “E persona a bisa di ta un dokter anto purba haci un tracheotomy riba e victima anto el a fayece. Ora cu hende ta bisa cu nan ta dokter, ami ta train mi personal pa pidi pa identificacion pasobra nan ta pafo di nan hurisdiccion.”