Na october di aña pasa, minister di Turismo, Dangui Oduber a informa tocante e buskeda di artistanan local pa forma parti di Palm Beach Tower Art Project. Dia 29 di april ultimo a anuncia tocante e conceptual desing cu lo keda den man di artista Paul Wong.
Den e tempo ey, e mandatario a informa cu e prome fase a keda cla caba, caminda nan a traha e plataforma cu ta ser usa tanto pa hendenan local como pa turistanan for di añanan caba y cu den ultimo lunanan di aña pasa por a mira cu e prome fase di e renobacion di e plataforma a ser culmina.
Segun Oduber a bisa e segundo fase tabata trata di un invitacion na artistanan local pa nan lo usa nan creatividad y presenta ideanan di kico por pone den e toren cu ta di color blanco pa asina cuminsa busca “cua ta e diseño cu comunidad kier mira of cua ta e diseño cu nos mester pone.”
Anteriormente tabatin e bandera di Aruba y turistanan ta bay haci uso di dje pa saca potretnan y publica nan riba social media y esey tambe ta e motibo di pakico nan a haci un yamada na artistanan local pa participa den e request of proposal (RFP) pa asina nan por a haya un idea of pensamento di kico mester pone den e toren pa bira un atraccion turistico back den area di Palm Beach.
Minister Oduber a informa cu for di october caba nan a publica riba su social media e invitacion aki denomina “Palm Beach Tower Art Project” dirigi pa e artistanan local cu lo kier forma parti di esaki “esaki ta un bunita proyecto pa nos showcase no solamente na nos mercado local sino tambe na nos turistanan y p’esey nos ta extende e invitacion pa cuminsa participa durante 10 dia y despues ora nos lo haya esnan cu kier participa nos lo haci un evaluacion cu un comision y finalmente den un luna aproximadamente e trabou oficial por cuminsa.”
Awor, finalmente e mandatario a informa cu “despues cu nos a drecha e plataforma na Palm Beach e siguiente fase lo ta un diseño pa e toren. Esaki ta e conceptual design di artista local Paul Wong pa por keda cla cune.
Esaki ta e parti dilanti, e parti patras tambe tin un conceptual cu lo post.”
Riba rednan social e publicacion di e minister Oduber a haya basta reaccion na unda tanto personanan local y turistanan lo haci e di e plataforma aki sigur un punto nobo di atraccion.
