(Diariolibre) – E minister president di Republica Dominicana, José Ignacio Paliza, ta di acuerdo cu e postura di e presidente Luis Abinader diahuebs, cu ta mira e practica di gobierno di deporta persona indocumenta pa nan pais di origen como algo ‘natural y recurente’, na mesun manera cu Donald Trump a propone desde comienso di su campaña.
Sinembargo, e minister president ta bisa cu e accionnan aki “mester semper pasa segun ley internacional, segun e mihor forma y mihor practica”.
“Cada pais tin e autoridad y derecho di atende cu e tema di migracion segun su propio ley, y nos tambe lo haci mescos cu stranheronan cu ta biba di forma iregular na Republica Dominicana, fundamentalmente cu e Haitianonan den nos pais,” Paliza a bisa durante rueda di prensa ora e la ricibi e pregunta tocante e politica di migracion cu Merca ta implementando y cu ta afectando Dominicanonan indocumenta den nan nacion.
El a expresa cu personalmente e no ta mira un elemento diferente, e unico ta cu mester deporta personanan segun leynan internacional pa asina haci esaki na e mihor forma y mihor practica.
Cu esey, e ta bisa cu esaki ta un accion normal y cu “nos tambe ta haci’e tur dia, segun nos ley”.
