Despues di un luna cu palabracionnan a tuma luga entre Reino y pais bisiña Venezuela riba con pa soluciona preocupacionnan di manera bilateral, ainda no tin ningun solucion cla na bista pa habri frontera. Keto bay e frontera entre islanan ABC ta keda cera, mientras crisis na Venezuela ta escala y mas ciudadanonan di e pais bisiña ta huy na otro paisnan cercano.
E exodo di nos pais bisiña pa Colombia y otro paisnan Latino Americano ta yegando na un punto cu e paisnan aki nunca a conoce anteriormente. Manera fuente El Espectador ta raporta, Colombia pa ultimo tempo segun registro oficial ta conoce un exodo di mas cu mita miyon Venezolanonan na Colombia. Di e mita miyon, 350 mil di nan ta migrantenan iregular. Es mas, desde Ministerio di Relacionnan Exterior na Bogota por a constata cu diariamente tin 35 mil migrante di Venezuela cu ta drenta, un cifra cu den aña 2017 a percura pa un fluho di migracion aumenta pa 110%.
E pais bisiña di Venezuela a tuma medidanan pa yuda alivia e peso humanitario cu ta cay riba tur e nacionnan bisiña por medio di entre otro desde augustus di aña pasa facilita expedicion di permisonan temporario valido pa 90 dia renovabel te un periodo maximo di 2 aña. Sinembargo por mira cu un cantidad di Venezolanonan ta uza Colombia como un prome stap di salida pa bay emigra na otro pais.
Actualmente despues di un luna cu gobiernonan di Reino Hulandes a sinta hunto cu representantenan di Venezuela no a bin cu solucionnan concreto, tanto pa loke ta trata plannan pa alivia crisis humanitario como yega na un solucion pa e problema di traficacion di metalnan precioso manera oro pero tambe metalnan manera koper. Lo ultimo cual tabata un preocupacion di gobierno di Venezuela tambe a wordo spierta despues cu durante weekend ultimo Ministerio Publico, Afpakteam y Cuerpo Policial di Aruba a detene un pasahero cu lo a bay trafica rond di 50 kilo di oro, cu informacion haya via FIOD na Hulanda (Fiscale inlichtingen- en opsporingsdienst).
E medida cu gobierno di Venezuela a tuma manera conoci ta keda vigente pa tempo indefini, y si lo bay habri fronteranan atrobe no por wordo premira. Pero si ta keda vigente conseho negativo di gobierno Hulandes tanto como di gobierno di Aruba pa loke ta trata biahe pa Venezuela. Tur esaki mientras pa ciudadanonan Venezolano ta bira mas y mas dificil pa haya acceso na documentonan di biahe Venezolano.
Gobierno trahando riba plan pa yuda alivia crisis humanitario
Manera nos a publica siman pasa, prome minister, Evelyn Wever-Croes (MEP) a declara durante un conferencia di prensa cu actualmente tin trabounan andando pa asina mira un manera pa alivia e fluho di personanan cu ta haya nan mes forsa pa sali di nan pais. Aunke, segun e prome mandatario, e situacion na nos pais bisiña actualmente no ta padece di un estado di emergencia, tin organisacionnan na Colombia cu ta haciendo yamada pa hisa e señal aki oficialmente.
Sra. Wever-Croes a subraya anteriormente tambe cu aunke Aruba a firma e protocol di e convenio pa refugiadonan, te na momentonan actual no por considera cu ta papiando di migracion pa via di problemanan politico, si no pa via di motivacion economico. Sinembargo aunke Corsou no a firma un convenio, a tuma 70 persona caba como refugiado via canalnan oficial, mientras na Aruba no tin ningun persona cu a ricibi status di refugiado te awo oficialmente.
Directora di departamento di Asuntonan Social, Glenda Hernandez den un entrevista cu Bon Dia a bay di acuerdo cu prome minister bisando cu mester busca canalnan na Nacionnan Uni pa asina percura cu personanan cu yega nos isla como refugiado por wordo traspasa pa otro pais mirando cu ‘nos no tin capacidad pa tanto hende’.
Te na momentonan actual nos no por a determina con leu e palabracionnan a bay entre gobierno cu Nacionnan Uni of Organisacion Internacional pa Migracion (IOM). Manera nos a publica prome minister te hasta a tuma nota di paisnan manera Surinam cual a expresa den pasado un interes pa crece den poblacion. Si esaki ta un dialogo cu a wordo cuminsa of ta den proceso nos no por a determina te na momentonan actual. Pero nos lo sigui e desaroyo aki di cerca pa asina haya sa con leu palabracionnan ta.
Centro pa ricibi refugiado
Sinembargo e punto di unda lo bay percura pa tin un luga pa personanan cu drenta como refugiado por wordo ricibi no ta cla te ainda. Tabatin un plan di parti di gobierno anterior pa haci di centro deportivo tras di Cruz Cora na Dakota un localidad pa ricibi refugiadonan. Con leu e plannan aki nos no por determina. Pero sra. Hernandez a conta nos cu actualmente tin palabracionnan andando pa haci un luga disponibel.
“Lo ultimo cu mi a tuma nota di dje ta cu tabatin un centro, pero esaki lo haya renobacion, pues pa awo e ta off limits.” Sinembargo sra. Hernandez a confirma cu un presupuesto destina pa e problema aki a bin cla, cual ‘ta facilita pa cuminsa traha riba solucionnan’.
Colaboracion den Reino
Pero pa loke ta trata colaboracion entre Reino nos a tuma nota di prome minister su sugerencia pa manda refugiadonan pa Boneiro, cual secretario di estado Knops, no a haya un bon idea. Anteriormente sra. Wever-Croes a declara cu e ta haya cu Hulanda tambe por contribui na solucionnan pa alivia e situacion na pais bisiña, mirando cu ta algo cu ta afecta henter Reino.
Pregunta ta keda habri te ainda si Aruba lo ta cla pa un exodo masal di Venezolanonan na nos isla en caso cu e situacion keda empeora na nos pais bisiña y mas hende dicidi di bin aki. Y te ainda no ta conoci ki rol Hulanda lo tuma den e asunto aki.
