Palabra diligencia… Desconoci pa gobierno…

Presion ta aumentando riba gobierno pa duna un claridad den ki direccion nos ta bay e aña aki como pais, y kico ta e medidanan concreto cu lo tuma pa esaki. E presion ta bin di varios banda. Por ehemplo di gobierno Hulandes cu ta haya cu e proceso di reforma cu mester tuma lugar ta bay demasiado poco poco. Naturalmente cu gobierno di Aruba por argumenta cu ta te awor a keda cla cu Huland mes, pa loke ta presupuesto 2021, unda supuestamente e efectonan di e reformanan necesario mester aparece. Pero e respuesta ey lo no ta satisfactorio.

Na promer lugar ta gobierno di Aruba mes cu a keda ‘drag their feet’ te november promer, cu finalmente a entrega y a firma e convenio cu Hulanda pa haya ayudo, y a cambio bin cu e reformanan cu ta mira necesario. Si a cera e acuerdo mas tempran den aña lo nos por ta hopi mas leu caba.

Ademas, tin asunto cu por a atende basta tempo pasa caba. Por ehemplo e asunto di 5 miyon florin cu mester austerisa cada luna riba presupuesto di AZV, cu a resulta algo permanente, no pa 2020 so, sino pa e aña aki tambe. Awor no mas, na februari 2021, porfin gobierno ta bay sinta cu e ‘stakeholdernan’ di sector di salud pa delibera unda mihor por corta y unda no… Pa haci esey, mescos cu tanto luna pasa, gobierno no mester tabatin mester di niun Hulanda, pero aparentemente ‘consulta di buena fe’ ta existi ora gobierno kier tuma iniciativa pa esaki. Te na e momento ey e gremionan por wel di grita, no tin oido. Nada straño, asina nos conoce nos gobiernonan. En todo caso, despues cu henter 2020 gobierno mes tabata dicidi unda ta corta, awor cos ta birando mas dificil, tambe pa ‘bende’ e maneho aki cu publico den tempo di campaña, y awor ta entama consulta cu tur esnan envolvi… Vaya diligencia. Di tur manera, ta di spera cu e consulta resulta fructifero y cu por bin cu e mihor plan posible, unda lo corta, con cu bira e asunto, 60 miyon di gasto di sector salud pa e aña aki. Dificil pa imagina cu ta haci esey sin mishi cu parti esencial di cuido, pero nos lo keda den scur encuanto esey, por lo pronto.

Presion Hulandes tin tambe pa e reforma di legislacion laboral, pa facilita retiro di empleado, un punto hopi sensitivo pa cualkier gobierno. Asina leu cu nos informacion ta yega, no tin nada entama den legislacion pa e materia aki te awor. Sin embargo, aki tambe tin asunto cu no mester warda riba Hulanda pa tuma medida. Algun gremio empresarial a caba di manda un carta di urgencia pa gobierno, urgiendo nan pa cuminza implementa e cambionan acorda pa cuminza caba cu e asina yama ‘red tape’ pa haci bida di sector priva menos dificil. Tin hopi cos cu por haci cu no ta requeri cambio di ley, unda e ultimo aki enberdad ta tarda bastante. Un di e asuntonan ey ta e prohibicion, contra ley, di para tur peticion di retiro pa trahador. E carta di Ahata, Atia Y KvK manda recientemente ta referi na e problema cu companianan no por restructura pa salba e empresa, y tin como unico alternativa laga e empresa bay bancarota. E daño e ora ta hopi mas grandi, pa tur empleado y e empresa mes tambe. Un suplica similar a bay di e asociacion di restaurante AF&BA pa ministro encarga cu Labor pa atende nan preocupacion. Un cos si, mester regla e asunto di subsidio di salario. Un empresa no por come e bolo y keda cune. Di otro banda, ministro encarga cu Asunto Economico y Finanzas a publica un serie di medida pa yuda empresanan, entre nan varios impuesto. Esey ta di aplaudi, pero no tin ainda otro cambionan cu mester pa acelera proceso na diferente departamento. Un di nan ta e kehonan riba Dimas, encuanto e procesamento di permiso, asunto cu ta toca empresa en general. Tambe den nos edicion di ayera por a tuma nota di keho di inversionista stranhero cu, unavez admiti cu nan inversion aki, ta keda haya problema grandi pa e departamento aki tramita nan permisonan cu diligencia. Esaki no ta yuda mehora nomber di Aruba den exterior encuanto inversion, na un momento cu nos mester tur inversion cu nos por haya. Y ta hustamente esaki ta e cosnan cu no mester warda pa cambia ley ni nada; ta mas bien e voluntad pa impone otro forma di traha riba e aparato. Al fin y al cabo, nan ta empleado publico cu mester cumpli orden di superior. Nan no ta den un tipo di parlamento unda ta keda discuti y tur cos ta parce di ta depende di nan ‘buena voluntad y cooperacion’. Por ta cu ta sindicatonan di empleado publico a traves di aña a haya e impresion cu nada no por sucede sin nan consentimiento, pero esey no ta asina. Di tur manera, tur cos ta parce di ta dura un eternidad, pa cuminza cu e actitud di ‘lastra pia’ di e gobernantenan mes, pasobra nan no ta parce di ta convenci di e medidanan pa mehoracion cu Hulanda ta obliga nan guli. Si ta pa nan, Aruba ta keda manera e tabata…?