Corte Supremo di Pakistan a mantene e sentencia duna den e proceso anterior, unda hues no a mira prueba palpable di blasfemia, cu tabata e acusacion contra e muhe Aasia Bibi, di fe catolico. Despues di e decision remarcabel, Bibi lo por ta finalmente hunto cu su yiunan cu a huy bay Canada unda nan a haya asilo.
Abogado di Bibi, Saiful Malook, cu a bolbe pa Islamabad despues di huy di e pais pa menasa di morto, a yama e decision un victoria pa constitucion y imposicion di ley na Pakistan. E Corte Supremo di tres hues a insisti di kier mira “prueba hopi estricto di blasfemia” y no a haya nada, Malook a bisa, expresando e speransa cu e veredicto na fabor di Bibi lo yuda contra acusacion falso di blasfemia (contra fe Islamico) den futuro.
Desde su luga di keda secreto, Bibi a mira e decision reporta na television local, di acuerdo cu un amigo cu a papia cu ne mientras tabata anuncia e decision. Bibi su prome pensamentonan tabata pa su yiu muhenan, e amigo a bisa, papiando bao condicion di anonimato, pa miedo di represalia di militante radical Islam.
“Mi ta realmente agradecido na tur hende, awor despues di nuebe aña ta confirma cu mi ta liber y mi ta bay brasa mi yiunan,” el a bisa cu Bibi a expresa. Bibi a haya un sentencia di morto na 2009 pa supuesto insulto di fe Islamico.
Magistrado Asif Saeed Khan Khosa di e Corte Supremo a dirigi e panel di hues cu a rechasa e peticion pa revisa e decision di corte di 31 di october pasa, unda a dicidi di rechasa tur acusacion, cu por a pone Bibi den prizon atrobe, cu e perspectiva di un ehecucion. E hues a bisa den corte cu e acusadonan di Bibi a comete perhurio y si e caso no tabata asina sensitivo, nan lo mester a bay prizon pa resto di nan bida.
