“Pakico ta enfoca riba AVP so”; Lider di AVP ta confia den inocencia di Benny Sevinger y ta hay’e noble

Mike Eman ta cuestiona Ministerio Publico di kier unicamente enfoca riba AVP pero ta ignora con MEP pa añanan a haci un solo famia rico cu contract y huur di edificio. Asina lider di AVP a bisa despues di entrega lista na Conseho Electoral, acompaña pa candidato Gerlien Croes.

Den su declaracion, Eman a bisa AVP kier pa trahadonan di WEB y Elmar recobra nan salario completo, y tur medida cu Gobierno actual a impone riba comunidad mester keda hala atras. Croes ta un di e streanan nobo di AVP y segun Eman, tin hopi mas. “AVP a atrae un cantidad grandi di profesional, economista, educador, persona cu capacidad riba tereno di finanzas y tereno social y tereno di labor y comercio . Un lista balansa cu profesionalnan cu por atende cu e rescate di Aruba.”

Eman a acusa e Gobierno actual di no a tene dialogo cu gremionan, y ningun momento tabatin un economia creciente. E team di rescate, den su concepto, ta inclui caranan nobo hunto cu personanan experiencia, incluso un specialista medico, Selene Kock cu mester percura cu Aruba haya un maneho coherente riba tereno di salud.

Lider di AVP a bisa cu e posicion di Benny Sevinger riba number 29 tabata duro p’e, pasobra semper nan dos tabata sigui otro. Sevinger ta un hende cu a brind’e amistad y hunto a lanta AVP desde cu a cay na 6 asiento. “Mi ta convenci cu e ta inocente. P’esey e ta riba lista. Nos ta confia pueblo pa dicidi.” Eman a bisa cu Sevinger a tuma un posicion noble y esaki ta uno di respet pa institucionnan. Pero e tin confianza den Sevinger y ta keda pendiente pa husticia cana su caminda.

“Mester laga husticia prevalece. Pero mester puntra pakico ta enfoca riba AVP so.”

A puntra Mike Eman di e cantidad di sostenedornan cu a acompaña e partido den e proceso di entrega lista. E parada a hasta crea stagnacion den Playa. Segun Eman, e idea ta pa hendenan expresa nan emocion, pero e intencion tabata pa tur a keda den nan auto. E ta consciente cu no tur cos a bay segun reglanan di DVG pa evita contagio, pero esey ta pa motibo di entusiasmo di hendenan pa AVP.

Lo drenta Parlamento

Segun Eman, na 2017, AVP a perde asiento, y como tal, e anochi di eleccion, el a asumi responsabilidad. Sinembargo, mirando cu e mes no a bay atras den voto, a pone realisa cu su hendenan kier pa e sigui den politica. Como tal, Mike Eman lo ta bek sea den Parlamento of den Gobierno el a bisa.