Si puntra mayoria di muhe tocante con nan famia masculino, partner y amigo ta responde na bira malo, nan ta bisa cosnan manera ‘e ta keha di mas’, ‘e ta un baby’ of ‘e ta exagera hopi’. Pero por tin un splicacion biologico pa e comportamento aki.

Denomina ‘man flu’ (red: griep di homber), e fenomeno aki ta valida den un revision di estudionan grandi epidemiologico publica anteriormente, como tambe estudio di influenza den animalnan. Den e estudionan aki, ser masculino tabata malo pa mas largo, cu sintoma mas severo y tabatin un respuesta mas zwak na vacunacion. Test di laboratorio cu animalnan infecta cu virus di influenza tambe ta subraya cu tin diferencianan basa riba sexo den respuesta immuun cu ta influencia resultadonan observa den ser humano.

Como toxicologo respiratorio y investigador investigando diferencianan di sexo den sistema respiratorio, Meghan E. Rebuli, autor di e articulo aki, tabata intriga pa lesa tocante un estudio recien tocante respuestanan specifico pa cada sexo na Covid-19, cu ta sugeri cu realmente homber ta mas vulnerabel y ta sufri mas di e malesa aki.

Diferencia di sexo den Covid-19
 E hallazgonan aki por aplica na otro virus respiratorio manera SARS-CoV-2, cu ta causa COvid-19. Por ehemplo, reportenan di cantidad di infeccion di SARS-CoV-2 ta similar entre ser masculino y femenino, pero sexo masculino ta un factor di riesgo significante pa malesa Covid-19 mas serio y morto. De hecho, un estudio a revela cu homber ta 2.4 biaha mas probabel di muri di Covid-19. Ta interesante cu tasa di mortalidad mas halto entre homber tambe ta tuma luga cu otro malesa di coronavirus manera SARS, causa pa SARS-CoV, y MERS.

Basa riba data di CDC Mericano te cu dia 5 di october ultimo, e riesgo di morto di Covid-19 den homber edad 30-49 aña tambe tabata mas di dobel esun di muhenan.

Den otro gruponan di edad, e riesgo di morto relaciona cu Covid-19 den hende homber tambe tabata mas halto cu den hende muhe di e mesun edad. Pero no tabata mesun halto cu den e grupo di edad 30-49 aña.

Esaki ta den contraste cu tasa casi igual di infeccion SARS-CoV-2 den e mesun gruponan di edad, conduciendo cientificonan pa cuestiona pakico ser masculino ta mas suceptible.

Estudio ta identifica pakico homber por ta mas suceptibel pa Covid-19
 E reporte recien publica den Nature ta explora con ser masculino y femenino ta responde diferente na Covid-19.

E estudio aki a examina muestranan incluyendo swab di nanishi, slijm y sanger, cual a wordo sea colecta di individuonan saludabel of di pashent di Covid-19. E muestranan aki a ser usa pa compronde miho con e respuesta immuun ta mustra y con e ta diferente den hende cu un malesa mas severo.

Similar na datonan di CDC riba tasa di infeccion, no a observa diferencia basa riba sexo den e concentracion di e virus of e cantidad di virus presente den swab di nanishi of slijm. Tampoco tabatin diferencia den nivel di anticuerpo – un señal cu e curpa a identifica e virus – detecta den homber y muhe infecta.

Homber cu SARS-CoV-2 ta mustra mas inflamacion
 Sinembargo, e autornan a identifica diferencianan mayor entre sexo durante e respuesta immuun inicial cu ta tuma luga poco despues cu un persona ta infecta cu virus SARS-CoV-2.

A analisa e muestranan di sanger pa un variedad di cytokine – algun di e prome moleculenan di señal cu ta yuda celnan immuun responde na patogeno. E nivel di e señalnan aki ta aumenta y reduci pa provee un respuesta adecua pa bringa un patogeno invasor. Pero cantidadnan halto di e moleculenan aki por causa daño severo den e curpa. Esey ta e caso den un ‘cytokine storm’.

E autornan di e reporte den Nature a observa diferencianan di sexo den e forsa di e respuesta cytokine. Hombernan a mustra nivelnan mas halto di cytokine cu a duna impulso na inflamacion, manera IL-8 y IL-18, compara cu muhe. Cantidadnan mas halto di e cytokinenan aki ta vincula na un malesa mas severo. Den casonan severo di Covid-19, likido ta acumula den pulmon, reduciendo e oxigeno disponibel den e curpa pa funcionnan normal. Esaki por conduci na daño di tejido, shock, y potencialmente e fayo di varios organo.

Ser femenino cu SARS-CoV-2 ta miho prepara pa elimina e virus
 Ademas di diferencianan basa riba sexo den nivel di cytokine, e autornan tambe a haya diferencianan basa riba sexo den e funcion di celnan immuun.

Compara cu homber, muhenan tabatin un cantidad mas halto di T-cel – esencial pa elimina e virus – cu tabata activo, prepara y cla pa responde na infeccion SARS-CoV-2. Homber cu nivelnan mas abao di e T-celnan activa aki tabatin mas probabilidad di haya un malesa mas severo.

Pues, tin varios aspecto di respuesta immuun humano na SARS-CoV-2 cu ta diferente entre homber y muhe. Comprondiendo e diferencianan aki por informa con dokter ta trata pashent y por yuda investigadonan desaroya terapia specifico pa cada sexo.

Aumento den suceptibilidad di Covid-19 den homber probablemente ta biologico
E resultadonan aki ta contradeci speculacion cu suceptibilidad na infeccion di SARS-CoV-2 ta pa motibo di comportamentonan mas riesgoso. Esey ta inclui bagatelisa e seriedad di e virus, join reunionnan grandi y ignora guia di distancia social, como tambe menos labamento di man y bistimento di tapaboca. Na luga di esey, tasa di infeccion ta en berdad similar entre homber y muhe, mientras homber tin mayor riesgo di un malesa serio, sugeriendo diferencianan biologico den respuesta pa infeccion.

E documento aki ta un di e prome di su tipo pa inspecciona diferencia di sexo den mecanismo di suceptibilidad. Cu riesgo biologico innato mas grandi pa malesa severo y morto den homber, esaki ta sugeri cu ser masculino mester ta hypervigilante tocante distancia social, laba man y bisti tapaboca.

Mayor cumplimento di proteccion pa prevencion di infeccion, principalmente den homber, no solo lo reduci nan riesgo di infeccion sino tambe combati nan riesgo aumenta di malesa severo y morto di Covid-19.

E mensahe di e documento nobo aki ta cu investigadonan mester considera strategianan pa sigura tratamento y vacuna cu ta igualmente eficiente pa tanto muhe como homber, specialmente ora un ta mas suceptible cu e otro.