Di berdad e cambio di gobierno ta treciendo algun cos casi comico, si no tabata trata di cosnan asina serio, na luz di dia. Den un entrevista cu a keda publica ayera den e noticiero Noticiacla, e director di Refineria di Aruba NV a duna bastante claridad riba kico ta e acuerdonan cu tin o tabatin entre gobierno – anterior – y e compania. Basicamente ta papiando aki di acuerdo di pasa placa pa e accionista unico, Pais Aruba, den forma di dividendo adelanta, di e sumanan cu lo a ricibi di Valero, y di Citgo Aruba Refining NV. Tambe e compania a palabra cu lo a lanta un suma di en principio Afl. 40 miyon, cu ta coresponde na e asina yama benta di e compania Fuels Marketing & Supply Aruba (FMSA) NV na tercera persona cu nos no mag sa ta ken e of nan ta.

Contal cu den e presupuesto di e aña aki gobierno anterior a pone como entrada e suma cu nan a spera di haya di e benta aki. Despues cu e ministro encarga cu Energia a laga sa cu no ta bende e compania mas, den e editorial aki a haci e pregunta ta con gobierno kier ‘eat the pudding and keep it’. Esey nos a haya sa recientemente, ora e prome ministro nobo a revela cu e idea tabata pa Refineria di Aruba NV fia e 40 miyon y pasa e placa pa gobierno. Pero mientras tanto e problemanan na Citgo, entre otro e aresto di gran parti di e gerencia na Merca di e compania, ta aparece como e obstaculo grandi cu ta pone tur e asunto den duda grandi. Motibo pa banconan local cu lo a acerca pa duna e prestamo, a dal para un rato, te cu nan por tin mas claridad riba e situacion na e compania cu ta huur e refineria. Algo cu ta zona logico. Pero tin algo den e storia aki cu no ta zona logico at all.

Y esey ta cu, si mester bay banco pa fia placa, no ta miho gobierno mes haci esey? Cu nos a comprende awor, e idea ta pa gobierno fia placa riba mercado local pa cera e buraco – grandi- den presupuesto 2107, di cual e famoso 40 miyon di benta di FMSA ta parti. Segun cu a bira conoci, Pais Aruba e aña aki a fia cu emision di bono riba mercado local pa entre 4 y 5% di interes. Ta practicamente sigur cu Refineria di Aruba N.V. nunca por haya fiansa pa un interes asina abao, cu tur e riesgonan empresarial cu e refineria ta representa, sigur si ta papia di e socionan actualmente menos confiable na mundo, cu ta e consorcio di Pdvsa, incluso tur su filialnan, entre nan Citgo.

Ademas, kico lo sucede si Citgo no por cumpli, y Refineria di Aruba no por haya entrada y por lo tanto no por paga e prestamo na banco; ken finalmente mester remedia e situacion aki? No ta esun cu ta na timon di Pais Aruba, doño di e accionnan di Refineria di Aruba? Sin duda algun henter e chasco aki di fia placa pa duna gobierno mester a zona straño tambe den e oido di esunnan na banco local cu mester a atende e asunto: uno cu ta bin fia placa na interes halto, pa duna un otro cu tin mas garantia pa duna banco y por lo tanto por haya placa fia pa menos interes!

Pero, e scenario cu gobierno anterior, conhuntamente cu e gerencia di Refineria di Aruba kier a sigui, ta lanta mas pregunta ainda. Esaki en berdad tabata un di e trikinan di e acrobata cu a inventa tambe e famoso ‘kwijtschelding’ di Afl. 61 miyon cu gobierno a regala su mes, aparentando cu ta SVb a duna kwijtschelding, mientras cu ta e stempelparlement di e partido a percura pa esaki? Tabata trata di nada mas ni nada menos cu un cortina di huma pa camufla e condicionnan bao di cual gobierno lo a haya e placa, aparentando cu tur cos ta OK den e negoshi entre e compania estatal y e subsidiario di Pdvsa?

Y, papiando di pasa placa pa compania madre via dividendo adelanta, no ta esaki ta loke Pdvsa y gobierno comunista di Maduro tin añanan largo ta haci cu Citgo Petroleum y Citgo Holdings na Merca? Laga nan tuma prestamo y hipoteca e accionnan tanto cu Rosneft como tambe anteriormente cu tenedonan di bono na Merca? Te cu awor si e companianan aki no por carga mas, motibo pakico Citgo no por financia e proyecto na Aruba?

Poco poco Aruba ta cuminsa haya mas bista riba e patrañanan cu gobierno anterior tabata organisa pa scapa su curpa, poniendo na riesgo futuro di e pais aki. Awor si nos ta desea di haya sa te den detaye ta kico ta sosodiendo den Refineria di Aruba y Citgo, entre otro na kico ta gastando e beneficionan cu Refineria di Aruba ta saca for di su subsidiario FMSA, cu ta e unico cu ta produciendo placa actualmente. Kico lo a pasa cu Aruba si e hendenan aki a sigui goberna?