Pakico nos ta concentra riba prioridad robes…?

Den e simannan cu a pasa, nos por a disfruta, o consumi, cu un show directamente di Den Haag, unda a bay atende supuestamente asuntonan hopi importante pa nos pais. Un di e encuentronan a termina cu un bochorno cu tabatin como consecuencia e perdida di un parlamentario. E partido envolvi lo sobrevivi esey y sigui dilanti, sin duda.

Lamentablemente loke nan a bay haci mes a haya hopi menos atencion. Tambe tabatin otro asunto pa atende cu tabata e ley di Reino encuanto areglo di disputa cu a termina manera por a anticipa: Hulanda no ta bay duna e islanan e oportunidad pa blokia intervencion Hulandes ora nan ta considera esey necesario. Aunke nos presidente di Staten a bolbe cu e firme idea cu tin mas bataya pa gana, nos ta kere cu a yega na e limite di loke e pais Madre ta bay permiti.

E pregunta cu nos no ta mira surgi den prensa local ta, si loke nan a bay haci ta na bienestar di nos tur, o nan a bay atende algo cu principalmente pa nan mes como politico ta importante. Pasobra laga nos bisa e cos, no pa prome biaha, manera e ta. Ki ora ta surgi un intervencion di Reino? Ora tur cos ta andando bon aki? Si e Hulandesnan ta bin interveni mientras tur cos ta andando manera mester ta, anto cu nos derecho nos tin algo di reclama. Pero, no ta asina cu nan ta interveni ora nos gobierno(nan) ta perhudica nos, financieramente o den otro sentido, y nan mester interveni, pasobra como ciudadano Hulandes nos tin derecho riba gobernacion drechi? Asina mes, cada biaha atrobe ta bin cu e mesun storia di e ‘Hulandesnan fastioso ey cu ta hinca nan nanishi caminda no ta mishi nan.’ Nos lo bisa, no pa prome y sigur no pa ultimo biaha, cu nan ta mishi den asunto cu ta toca nan, pa ley, cu nos politiconan gusta esey of no, y sigur ora nos ta un pais cu un debe astronomico y un patrimonio fiscal negativo di mas di 2.500 miyon florin. Kico e ultimo aki ta significa? Pa tene e asunto un poco simpel: si Pais Aruba bende awe tur su propiedadnan, ainda ta keda un debe di 2,5 biyon florin… Realmente nos no ta comprende con algun tempo pasa e mesun gobierno aki tabata bisa cu lo bay dura hopi aña pa nos yega na teritorio sigur financieramente, y awor nan ta riba baricada pa termina supervision di Reino. “Nos mes por!” No ta esey ta e lema cu a casi bira fatal pa nos? No ta berdad cu tin intervencion pasobra nos tin decadanan ta proba cu nos no por?

Pero esey no ta tur nos preocupacion. Loke tambe ta nos preocupacion na e momento ta e problemanan cu ta biniendo riba nos caminda cu practicamente no ta haya atencion. Por ehemplo, e preocupacion di sector hotelero pa haya personal adecua y motiva pa traha. Nos no por trata esey como un simpel problema laboral cu e ministro concerni mester resolve. Y pakico no? Pasobra e ta abarca hopi mas cu un problema di oferta y demanda di labor. Su tras ta bin henter un compleho di pregunta relaciona cu algo cu nos ta prefera di no tin: un maneho demografico adecua. Un maneho cu ta trata di contesta e preguntanan cu ta surgi awor cu ta birando dia pa dia mas bisto cu nos no por haci nada otro cu importa miles di trahado. Awor, nos no ta bay den e discusion si esey ta necesario si of no; nos politiconan a tuma nan decisionnan y nos lo mira con cos ta bay… of no? Loke nos ta propone aki no ta pa subi baricada, manera nan ta haci cu Hulanda, pero si por lo menos haci e preguntanan al caso: ta pensando caba riba un maneho adecua con e importacion masivo ey di hende por bay tuma luga na un manera ordena?

Of nos ta bolbe haci loke nos a haci den pasado, unda na inicio di añanan 90 tabatin un intento modesto pa bin cu un maneho di inmigracion, cu despues a laga cay completamente pa pasa pa ‘e maneho cu no ta maneho’ (‘geen beleid is ook beleid’); lagando tur hende yega, ken cu ta, con cu ta, laga nan traha como ilegal y despues gradualmente tuma nan como ciudadano toch. Y claro cu tur esey a bay acompaña pa un corupcion legendario, cu tambe nos por ripiti. Nos ta sigur cu nos lo haya reaccion di algun persona cu ta bisa cu nos tin maneho pa entrada di stranhero. Disculpa nos, pero aki nos no ta papia di kico ta e regla y documentonan al caso pa por haya residencia. Nos ta papiando di ki tipo di hende nos kier y ki hende no. Kico ta e habilidadnan cu nan mester tin pa ta util pa nos economia y nos comunidad? Nos por siña hopi di paisnan manera Canada cu tin un maneho bastante bon pa logra haya e hendenan cu nan ta desea. Nos ta spera cu entre tur e biahenan den exterior y e pleitonan innecesario cu Hulanda, nos politiconan haya tempo pa dedica na nos problemanan real.