Pakico no ta djis… Tene frontera cera…?

Tin ora nos ta haya e impresion cu nos gobierno y parlamentarionan no ta tanto consciente di loke pa mas di binti aña caba nos tin como bisiña grandi. Un regimen criminal liga na narcotrafico cu, sin presencia di guera, a percura pa e exodo mas grandi di ciudadano, sea pa persecucion politico, sea pa busca un mihor porvenir na otro pais. Siria y Ucrania a sufri e consecuencianan di un guera formal cu a costa cienmiles di morto y destruccion masivo di infrastructura y lugar di biba. Na e paisnan ey a yega na un exodo mas o menos similar cu esun di Venezuela, cu a surpasa e cifra di 7 miyon. Na Venezuela tur esaki no a tuma lugar, sin embargo e destruccion di posibilidad di hiba un bida normal pa miyones a tuma lugar na man di e criminalnan aki. Ademas, e fin di e tragedia aki no ta na vista ainda y den e proximo añanan, si no bin un cambio radical na e pais, e continente aki, y nos tambe, lo mester keda tene cuenta cu e consecuencianan pa nos.

Awor, na e momento aki e deterioro economico enorme cu a tuma lugar no ta conveni e clase opresor na e pais, ni e parti civil, ni e parti militar, pasobra e base financiero pa explotacion di e pueblo ta birando cada vez menos y ta yega na un punto unda no ta facil pa mantene estado Venezolano funcionando, masque ta pa nan mes beneficio na promer lugar. Cu e resto ta pasa hamber, cu hospital y scolnan ta na werki, no ta parce di ta afecta e regimen, ni den sentido practico, mucho menos moral. Lo ta bon pa nos realiza cu nos ta experimentando di cerca e tragedia humano mas grandi di historia di e continente aki, despues di e barbaridadnan cometi den e epoca di sclavitud. Y en vista di esaki, ta dificil pa comprende e actitud di gobierno, cu ta keda insisti riba habri frontera… Den e splicacion na parlamento recientemente ta argumenta cu no por habri frontera awor, pero cu ta bay haci esaki den fase…, na beneficio di ken?

Ta menciona cu hende kier producto mas barata, comerciantenan ta pone presion pa gana placa cu producto di e pais ey, hende kier bishita famia biahando directamente… Con grandi e beneficionan pa esnan cu ta desea di probecha di e posibilidadnan di frontera habri, compara cu e bentahanan cu nos tin si nos tene e frontera, cu ademas a keda cera riba iniciativa di gobierno di Maduro, un di e poco cosnan bon cu el a haci, cera pa tempo indefini, te dia e pais haya un gobierno normal atrobe? Hende cu ta desea di bay Venezuela, por biaha via otro pais, cu nan mester paga mas ta nan mala suerte, nos tur di algun manera ta paga pa e tipo di anomalia den e mundo cu nos ta biba aden. Comerciante ta gana placa anyway, importando si mester di Antartida mes, si acaso ta necesario…

Awor e desbentahanan. Manera bisa anteriormente, ta bien posible cu por dura algun aña ainda promer cu e pais por bolbe na normalidad, es decir di tin un gobierno normal cu no ta sirbi na promer lugar interes economico di e politiconan corupto y criminal, cu ademas ta liga intimamente na e gruponan izquierdista Colombiano cu ta entre e narcotraficantenan principal di e pais ey. Ademas, bao proteccion di gobierno di Maduro tin un presencia fuerte di e cartelnan principal Mexicano cerca di nos aki, na peninsula di Paraguana. Cu entre gobierno izquierdista na Colombia y Venezuela, y e gruponan guerrillero (ELN, disidencia di Farc) lo bin un acuerdo di ‘pacificacion’ lo ta logico, pero esey lo bay para nan actividadnan di narcotrafico bao proteccion di gobierno Venezolano? Ta pakico nos ta kere cu gobierno di Maduro ta bay militariza parti importante di costa di Paraguana? Supuestamente pa controla narcotrafico, y den esey nan a haci un yamado riba autoridadnan di e islanan y di Reino pa ‘coordina’ cu nan… Nos ta gaña lubida cu Venezuela actualmente ta e puerto mas importante di salida di droga di continente Suramericano den direccion nort? Nos mester coordina cu e mesun gobierno cu ta facilita narcotrafico internacional na gran escala?

Y nos no a papia ainda di e problema continuo di e individuo Venezolano na nos isla. Awor aki caba, cu e frontera cera, gobierno mes ta papia di sigur 15.000 persona Venezolano indocumenta na Aruba. Un parti chikito a haci uso di nan derecho di pidi asilo, mientras e resto ta keda sin mas, sin regla nada…, y purba kita nan razon, pasobra ken ta stroba nan, gobierno sigur cu no, toch? Nos ta laga nan keda, nan no ta lastra riba caya, nan tin dak riba nan cabez, trabao, nan yiunan por bay scol… Si nos bay habri e posibilidad pa nan drenta via aeropuerto, ta mas ta bin ainda! Nos ta gaña lubida cu nunca den e mas di trinta aña aki e mayoria tabata yega aki clandestinamente via lama; e gran mayoria ta bin di turista y simplemente no ta sali mas…

Finalmente esaki: despues cu a laga Gobernador anuncia apertura di frontera, a haya bishita di Hulanda, pa despues anuncia cu por lo pronto no ta habri frontera. Atrobe ta Hulanda mester bin trece sano huicio den e asunto aki? Ki dia nos ta siña?