Ministro encarga cu energia ta haya cu e opinion expresa den e rapport di TNO no ta bon. Esey ta su sagrado derecho di opina, pero el a omiti duna siquiera un motibo valido pa sustenta e opinion, y a limita su mes na haci propaganda pa e proyecto di LNG (gas natural liquido) cu e compania Eagle LNG, manteniendo e secretismo di e caso, unda comunidad no sa kico exactamente a acorda cu e compania den e contrato proteha pa un Non Disclosure Agreement. Aki e partnernan a dicidi cu no ta asunto di comunidad di Aruba kico ta warda nan den e proximo 20 aña cu e contrato ta cubri. Segun TNO, cu aparentemente a haya e rapport pa mira, e hecho cu si Aruba gasta menos gas natural, mester paga un suma minimo halto toch, ta pone un freno riba desaroyo di energia renovable, pasobra paga e inversion aki, plus keda paga pa gas cu no ta usa, niun hende mester bay universidad pa comprende esey.

Banda di esaki otro hecho cu ta lanta duda riba e proyecto na Aruba ta montonando. Na Corsou a para e proyecto di trece LNG na e isla como solucion pa limita emision di CO2 y ta opta pa bay mas directamente den direccion di alternativa di energia renovable. E proyecto di LNG, tambe hunto cu e mesun Eagle LNG, tabata contempla tanto suministro di gas pa uso como combustible pa entre otro e planta di awa y electricidad, como desaroya e posibilidad di bunker gas na e isla pa transporte maritimo.

Esaki ta un noticia cu sigur na Aruba lo mester ta obheto di consideracion serio. Lo tin e fanaticonan, specialmente den y alrededor di gobierno, cu mes ora lo bisa: “Net bon pa nos, un competidor menos riba e tereno aki.” Esey lo ta un pensamento hopi robez; lo ta mihor studia e motibonan di Corsou pa descontinua e plan y de paso tambe e situacion actual di LNG den nos region. E motibo pa gobierno di Corsou ta e actual prijs di LNG, influencia pa e sucesonan na Europa, unda como consecuencia di e invasion na Ucrania paisnan Europeo a corta suministro di gas natural for di Rusia te na minimo y lo sigui te elimina esaki completamente.

Esaki a crea un base pa importacion masivo di LNG for di Estadonan Uni y otro proveedor global. Parti di e aportacion di Rusia na mercado mundial a cay afor, ya cu Rusia no por exporta tanto gas natural via maritimo pa otro cumprador, pa falta di flota cargador necesario, cu ademas ta tuma varios aña pa adquiri. Como cu esaki no ta un situacion pasahero, e nivel halto di prijs di LNG lo por permanece pa varios aña.

Tur esaki tin su influencia tambe riba un mercado secundario manera region di Caribe, loke a bin combina cu factornan negativo cu tabata existi anterior na inicio di e guera na Ucrania. Na 2021 Bon Dia Aruba a dedica un analisis na e tema di estado di desaroyo di LNG den nos region y a constata cu na e momento ey ya tabatin varios pais cu tabata produci (Trinidad & Tobago), importa y distribui gas natural den nos region. Desde varios aña caba tin esfuerzo pa distribui LNG den ISO-container especialmente pa e islanan chikito. Por a constata tambe cu posibilidad pa atende trafico maritimo cu bunkering di gas no tabata asina grandi, pa e presencia caba di e tipo di servicio aki.

Fuera di esey, un di e actornan grandi regional den petroleo y gas, Colombia, ta anticipa cu proximamente nan posicion di importador di gas natural lo converti den uno di exportador for di e puerto mayor den Caribe, Cartagena. Banda di Republica Dominicana, Puerto Rico, Trinidad & Tobago y Panama como posibilidad di bunkering, esaki ta parce suficiente suministro di gas, dificil pa imagina anto cu un bunkering station na Corsou por gana placa. Pero, esey ta conta pa Aruba tambe, y mas ainda, pasobra Corsou tin mas trafico maritimo cu ta pasa na e isla.

Lo anterior ta trece nos na e pregunta, con probable ta cu pa Aruba, sin tin e componente di benta cu exterior, LNG ta resulta un solucion faborable pa loke ta prijs. Esaki tumando na cuenta cu ademas mester paga un infrastructura caro di e tuberia di San Nicolas te Barcadera. Ta bon tambe pa dedica atencion special na loke e partner di Aruba, e compania Eagle LNG, ta haci den Caribe. E compania ta e partner elegi na Corsou tambe, cu awor a para e colaboracion aki, pa e motibonan splica… Fuera di esey, den Caribe ta dos isla so nan mes ta menciona como proyecto: Aruba y Antigua. Na Antigua ta trata di suministro na escala menor, solamente na e entidad cu ta produci electricidad (y awa), sin mencion di benta via bunkering.

Bolbiendo na e rapport di TNO, esaki a enfoca riba e deal di LNG cu ta mara Aruba pa 20 aña, pero no ta conoci si a dedica atencion na e otro factornan den nos region, cu ta dificulta un papel pa LNG na nos isla. Di banda di gobierno ta trece e alternativa di produccion di hidrogeno, cu lo por combina cu gas natural pa crea un industria nobo cu un gama di producto quimico. Esey ta sona bon, pero pa esey tambe tin iniciativa tuma den e paisnan cu tin petroleo y gas. Ademas na un escala industrial inimaginable cerca nos. Si no ta discuti e aspectonan aki, ta keda pega den propaganda barata cu no ta soluciona nada.