Gobierno ta bin e aña aki atrobe cu un pakete di VUT nobo pa asina baha e cantidad di ambtenaar. E pakete ta un areglo boluntario y nan lo introduci den lunanan di juni y juli proximo.
Minister di Financia Angel Bermudez ta anuncia esaki. E ta di acuerdo cu e organo di supervision financiero Caft cu mester baha gasto di personal. Pero e punto ta, segun e minister, e manera con nan por reduci personal for di aparato gubernamental. Pa e mandatario tin diferente manera, un menos of mas rigido cu otro. Pa haci e proceso aki menos traumatico social y economicamente papiando, e ta bisa nan ta bin cu e paketenan di VUT unda un ambtenaar por baha cu pension mas trempan.
Forman pa reduci personal
Un forma rigido ta si di biaha nan ta kita un cantidad di personal di un solo biaha, e minister ta splica. E por baha e gasto di personal di gobierno rapidamente; pero e no ta kere cu e ta e forma corecto. Ya cu e cantidad di hende cu ta keda desemplea unda ta bay gana nan entrada. Un posibilidad ta cu nan ta bay aumenta e gasto di onderstand di gobierno. Ademas desempleo tin su impacto social y economico cu gobierno kier evita pa e no subi. Pues e ta kere cu e forma rigido pa baha personal ta crea otro problema cu ta demanda placa y tempo aden.
E bahamento di personal di gobierno ta un proceso slow cu nan mester bay step by step. Pa tal motibo nan ta bay introduci un biaha mas VUT – regeling pa esun interesa di retira boluntariamente pa medio di un pakete.
Segun e mandatario nan ta dominando e parti di personal di gobierno pa medio di e sistema aki. For di 2015, tambe gobierno ta hibando un maneho di no tuma mas personal nobo cu excepcion di esunnan cu gobierno mester pa posicionnan cu ta rekeri un educacion profesional avansa. Mas tanto puesto of posicion pa drecha e calidad di e aparato gubernamental.
“Nos ta purba di mengua e aparato door di un maneho di VUT activo.” Nan a cuminsa traha e pakete di VUT pa hacie atractivo pa esunnan di e sector publico cu ta desea di sigui su carera na otro caminda of esun cu ta desea di baha cu pensioen prome. Asina e mandatario Bermudez ta haya cu nan ta bahando pa tres aña consecutivo e cantidad di empleado cu gobierno tin.
Sinembargo Bon Dia Aruba kier remarca cu riba e presupuesto y tambe den cuenta anual di gobierno te awor no por mira cu e gastonan personal real ta bahando. Esaki tambe ta un punto di critica di Caft cu contrario di e palabracion cu gobierno, nan no a cumpli di baha gasto cu 5% manera palabra.
