(AP) – Gobiernonan di Francia, Hulanda, St. Maarten y St. Martin ta bay reuni na Den Haag dia 15 di juni e aña aki pa discuti asuntonan comun di cooperacion a traves di frontera riba e isla.
E reunion a keda anuncia den un declaracion conhunto firma pa Hulanda y Francia na Den Haag riba diaranson durante e bishita di presidente Frances, Emmanuel Macron na Hulanda. Ambos pais a firma un pacto pa innovacion y crecemento sostenible.
E declaracion conhunto tambe ta dedica un paragraf na Caribe, titula “Cooperacion den region Caribense.” Ademas di e reunion na nivel top na Den Haag dia 15 di juni, e paragraf a menciona e intencion di firma un tratado di frontera dentro di poco. “E Republica Frances y Reino Hulandes ta comparti un frontera riba e isla di St. Maarten/St. Martin. 375 aña despues di e Tratado di Concordia, nos paisnan tin meta pa dentro di poco firma un tratado nobo pa e ubicacion exacto di e frontera riba e isla,” a declara den e declaracion conhunto.
E dos pais ademas a compromete na reforsa colaboracion bilateral y regional pa adresa retonan urgente di seguridad den region Caribense. A acorda cu ta bay completa e ratificacion di e Acuerdo di Status di Forsa (SOFA) riba cooperacion Caribense na 2023.
