(AP)—Despues cu e pandemia di coronavirus a resulta den lockdowns, a bira economianan riba nan cabes y a resulta den miyones morto, lidernan na e Organisacion Mundial di Salud y mundial a priminti pa haci miho den futuro. Algun aña despues, paisnan ainda no por yega na un plan acorda pa con mundo por responde na e proximo pandemia.
Un di nuebe y ultimo ronda di discusionnan envolviendo gobiernonan, gruponan di abogacia y otronan pa finalisa e “acuerdo di pandemia” tabata plania pa caba ayera. E meta di e acuerdo: liñanan di guia pa con e 194 pais miembronan den OMS lo stop pandemianan den futuro y comparti recursonan limita miho. Pero expertonan ta adverti cu tin virtualmente ningun consecuencianan pa paisnan cu no ta cumpli.
E paisnan den OMS a puntra e agencia di salud di e Organisacion di Nacionnan Uni (ONU) pa ta encarga di e discusionnan pa un acuerdo di pandemia na 2021. Envionan ta trahando duro durante e ultimo simannan pa prepara un version preliminario prome cu nan deadline fin di luna: ratificacion di e acuerdo na e reunion anual di OMS. Pero divisionnan entre partidonan envolvi por stroba esaki.
Senadornan republicano di Merca a skirbi un carta pa administracion di Biden siman pasa critico riba e version preliminar pa enfocando riba asuntonan manera “recortando derechonan di propiedad inteligente” y “dunando OMS mas poder.” Nan a urgi Biden pa no firma e acuerdo.
E departamento di salud Britanico a bisa cu e lo acorda solamente si e tabata “firmemente den e interes nacional di Reino Uni y ta respeta soberania nacional.” Y hopi paisnan desaroyando ta bisa cu no ta husto cu por anticipa pa nan provee muestranan di virus pa asina yuda e desaroyo di vacuna- y tratamentonan, pero pa despues no por paga pa esakinan.
“E acuerdo di pandemia ta un persecucion magnanimo, pero e no ta tuma realidadnan politico na cuenta,” segun Sara Davies, un profesor di relacionnan internacional na Griffith University na Australia. Por ehempel, e acuerdo ta purbando di adresa e buraco cu a sosode entre vacunanan di Covid-19 den paisnan rico y pober, cual director general di OMS, Tedros Adhanom Ghebreyesus, a bisa cu a contribui na “un fracaso moral catastrofico.”
E version preliminar ta bisa cu OMS mester haya 20% di e produccion di productonan relaciona cu e pandemia, manera test, tratamento y vacunanan, y ta urgi pa paisnan revela nan acuerdonan cu companianan priva. “No tin mecanismo dentro di WHO pa haci bida mas dificil pa cualkier pais cu ta dicidi pa no actua den cuadro cu e acuerdo,” Davies a bisa.
Adam Kamradt-Scott, un experto di salud global na Harvard University, a bisa cu similar na e acuerdonan global riba clima, e acuerdo di pandemia lo al menos provee un forum nobo pa paisnan purba mantene otronan na nan responsabilidad, unda gobiernonan lo mester splica ki medida nan a tuma.
E acuerdo di pandemia “no ta trata di hende bisando e gobierno di un pais kico e por of no por haci,” segun Ronald Driece, co-presidente di e directiva di negociacion di OMS pa e acuerdo. Tin obligacionnan legalmente vinculante bao di e International Health Regulation, incluyendo reportando rapidamente riba brotenan peligroso. Pero eseynan a ser rechasa repitidamente, incluyendo pa paisnan Africano durante e brote di Ebola y China den e etapanan inicial di Covid-19.
Suerie Moon, co-director di e Global Health Center na e Graduate Institute di Geneva, a bisa cu tabata importante pa determina e rol anticipa di OMS durante un pandemia y con por stop brotenan pome cu e plama globalmente. “Si nos fracasa pa probecha di e oportunidad aki…nos lo ta mesun vulnerable cu den 2019,” el a adverti.
Ta parce cu algun pais ta moviendo riba nan mes pa sigura cooperacion for di otro den e proximo pandemia. Luna pasa, e administracion di presidente Mericano Joe Biden a bisa cu e lo yuda 50 pais responde na brotenan nobo y preveni plamamento global, dunando e pais e bentaha si e mester informacion of material importante den futuro.
Yuangqiong Hu, un consehero legal y di politica na Doctors without Borders, a bisa cu no ta claro kico por ta diferente den e proximo pandemia, pero ta spera cu pa dirigi atencion riba algun di e erornan grandi cu a surgi durante e pandemia di coronavirus por yuda. “Nos lo mester depende principalmente riba paisnan pa haci miho,” el a bisa. “Y esey ta mustra preocupante awo.”
