(AP) — Merca y Canada a emiti mandato e siman aki pa prohibi e uzo di TikTok riba telefon di gobierno mirando cu preocupacion pa privacidad y seguridad contra atake ‘cyber’ via e app ta aumentando.

TikTok, cual ta di e compania Chines Bytedance, a mantene pa basta tempo caba cu e no ta comparti informacion di data cu gobierno Chines y cu su data no ta keda den China. Tambe e compania ta nenga acusacionnan bisando cu e ta colecta mas cu cualkier otro compania di red social, y ta insisti cu e ta funciona independiente pa su mes un management.

Pero hopi pais ta keda cauteloso di e plataforma y su conexion cu China. Aki ta un lista cu paisnan y regionnan cu a implementa prohibicion parcial of total di TikTok:

India

India a implementa un prohibicion riba TikTok y otro appnan Chines, incluyendo e app di mensahe WeChat na 2020 pa via di preocupacion cu privacidad y seguridad. E prohibicion a bin despues di un tension entre militar Indio y Chines na un frontera na Tibet cu a mata 20 soldaat Indio y a herida decenas. E companianan a haya chens pa contesta preguntanan tocante rekisitonan di privacidad y seguridad pero e prohibicion a bira permanente desde januari 2021.

Taiwan

Na december 2022, Taiwan a implementa un prohibicion riba TikTok pa sector publico despues cu e FBI a taha cu e app ta un riesgo pa seguridad nacional. Aparatonan di gobierno, incluyendo telefon, tablet y computer no tin permiso pa utilisa software Chines, cual ta inclui appnan manera TikTok, Douyin of Xiaohongshu—un app tocante estilo di bida Chines.

Merca

E siman aki, Merca a declara cu agencianan di gobierno tin 30 dia pa kita TikTok for di aparatonan y sistemanan federal pa via di un preocupacion pa seguridad. E prohibicion ta conta solamente pa aparatonan di gobierno, aunke algun legisladonan Mericano kier tin un prohibicion completo. China a zundra Merca pa su prohibicion, bisando cu esaki ta un abuso di poder di estado y ta stroba companianan di otro pais. Mas cu mita di e 50 estadonan Mericano a prohibi e app den aparatonan di gobierno.

Canada

Despues di e anuncio di Merca, Canada a anuncia dialuna cu aparatonan di gobierno no mag di uza TikTok, mirando cu esaki por presenta un riesgo inaceptabel pa privacidad y seguridad. Empleadonan tambe lo ta blokia di por download e app den futuro.

Union Europeo

E parlamento, comision y consehado Europeo a implementa un prohibicion pa aparatonan di personal. E parlamento Europeo a anuncia nan prohibicion diamars cu esaki no tuma efecto cuminsando dia 20 di maart. El a recomenda legisladonan e personal pa kita e app for di nan aparatonan personal.

Pakistan

Autoridadnan di Pakistan a implementa un prohibicion temporario riba TikTok al menos cuatro biaha desde october 2020, bisando cu e app ta promove contento inmoral.

Afghanistan

E liderasgo di Taliban na Afghanistan a prohibi TikTok y e wega PUBG na 2022 pa proteha e hobennan contra “desviacion.”