Pa prome biaha Ppais Aruba a firma un Acuerdo di Maneho cu Parke Nacional Arikok. Esaki a sosode ora cu Minister Otmar Oduber a reuni cu Parke Nacional Arikok (PNA) dialuna ultimo
Esaki ta crea apertura pa un relacion nobo entre Gobierno y Parke fortificando e relacion di trabou cu ta encera operacion di parke, proteccion di e areanan y pronto Parke Marino Aruba y 16 areanan protegi.
Segun e comunicado cu Bon Dia Aruba a ricibi ta indica, e Acuerdo di Maneho ta nifica cu a pone den un documento e responsabilidadnan cu Gobierno ta spera cu lo cumpli cune, pero PNA tambe den e documento aki sa y tin e espacio necesario pa por maniobra y maneha esaki conforme normanan di Gobierno. Na un forma cu ta conforme tambe cu “Good Corporate Governance” cu kier pa tin den cada departamento gubernamental, pero sigur tambe den fundacionnan cu Gobierno tin relacion di trabou cu nan, Minister Oduber a enfatisa.
Minister Oduber a sigui splica cu, cu e firmamento aki ta crea oportunidad di entre otro plannan cu lo mester tuma luga den futuro, un relacion mas estrecho pa loke ta e ‘database’ y estadisticanan di trabounan eherce pa Parke (mayoria bes a traves di DNM, como e departamento di Gobierno cu ta atende cu medio ambiente).
Otro siman lo bay tin un otro momento sumamente bunita pa PNA a traves di un tereno adicional, cu nan lo adkiri. Terenonan cu tabata den mannan priva, sinembargo conforme e statuut nobo cu tin aworaki, Parke lo adkiri esakinan pa por maneha esakinan pa Gobierno. Asina lo logra pa tin mas control pa loke ta e maneho cu nan ta eherce. Di e forma aki pa mas ainda logra e meta di preserva un area adicional di tanto importancia.
Finalisando, Minister Oduber a felicita e directiva cu a traha hopi duro durante di e ultimo lunanan riba e documento aki. Pronto no lo papia mas di Parke como un organisacion subsidia pa Gobierno, sino di un dienstverleningsovereenkomst cu lo wordo cera.
