Contrario na e reaccion di Minister di Finanzas, Gobierno no a cumpli cu e normanan palabra cu Hulanda

Reduci e gasto di compra di producto y servicio y paro di sosten financiero na entidadnan publico y semi publico. Banda di reduccion di gasto di personal, esakinan ta e medidanan cu Gobierno di Aruba mester tuma den Presupuesto 2022 pa reduci e deficit financiero, cu segun CAft no ta sostenibel.

Manera Bon Dia Aruba a publica den su edicion ayera, e entidad cu ta e consehero principal di Gobierno Hulandes riba asistencia financiero pa Aruba a enfatisa e recomendacionnan cu a duna Minister di Finanzas pa adapta Presupuesto 2022. Particularmente pasobra no a sigui e recomendacionnan aki. Den e carta CAft a amplia riba cada un di e recomendacionnan.

Producto y servicio

CAft ta bisa cu e gasto di producto y servicio di Gobierno mester baha structuralmente, pa asina yega na nivel di 2017, cu ta un suma di 165 miyon florin. Den su reaccion na CAft, Minister di Finanzas, Xiomara Maduro a bisa cu a sigui e recomendacion di CAft. Sinembargo, e organo a compara cu e realisacion promedio di locual a gasta prome cu e periodo di corona, cu tabata 174 miyon di 2015 te cu 2019. Pero a constata cu e gastonan presupuesta pa 2022 ta na 213 miyon cu ta “excesivamente halto,” segun dr. Raymond Gradus, Presidente di CAft.

“Gastonan relaciona na huur di edificio a aumenta drasticamente desde 2016, cu 40 porciento. E gasto pa paga servicio externo y trabaonan na terceronan a mustra un aumento di 13 porciento compara cu 2019. Tambe CAft a constata partinan nobo di servicio crea pa 2022, cu ta contribui na un uso mas halto di producto y servicio.”

Raad van Advies tambe a señala esaki den su conseho riba Presupuesto 2022. “Basa riba splicacion di Presupuesto y reaccion di Minister di Finanzas, CAft no ta mira e necesidad pa un aumento di e gasto presupuesta. CAft como tal ta keda para riba su punto pa ahusta e gasto di producto y servicio cu un reduccion di lo menos 39 miyon florin.

Serlimar

Los di e suma cu Gobierno ta pasa pa Serlimar regularmente, a presupuesta un suma adicional y Minister di Finanzas a busca e cobertura pa medio di un compensacion general den Presupuesto. Pero CAft ta bisa cu e paso aki no ta yuda soluciona e problematica structural den e entidad y e riesgonan cu e ta forma pa presupuesto pa Pais Aruba. Ya ta hopi tempo caba cu CAft ta hala atencion riba e punto aki.

Na 2020 a palabra cu Gobierno pa aumenta e tarifa y mehora cobranza. Den e periodo di 2018 pa 2021, Gobierno a duna Serlimar un suma adicional di 101 miyon florin. CAft kier ta informa di tur paso concreto cu a tuma pa cumpli cu e palabracion, particularmente con a ahusta e tarifanan y kico a haci pa mehora e cobranza. “E ta na interes di Aruba cu tin suficiente medida pa evita cu Gobierno ta financia entidadnan publico.” E punto aki ta referi tambe na Post NV y Arubus.

Como tal e recomendacion ta pa kita e gastonan aki pa asina por cuminza elimina e recorte di beneficio salarial di trahadonan publico y semi publico, particularmente mirando cu Conseho di Minister di Reino ainda no a tuma un decision al respecto. “Minister a bisa cu Aruba ta den combersacion cu Hulanda riba e tema aki. Den cuadro di un proceso presupuestal ordena, CAft ta ripiti su conseho pa no tuma e gastonan aki den Presupuesto 2022.” Es mas e colegio ta di opinion cu eliminacion di e recorte di 12.6 porciento mester ta compensa denter di presupuesto, preferiblemente denter di e gastonan di personal.

BVP (Plan di Maneho Reduccion Gasto Personal)

Minister di Finanzas a bisa CAft cu Gobierno ta cumpli cu e norma di gasto di personal, cu of sin e recorte. Sinembargo, CAft a mustra cu grafico e desaroyo di gasto di personal, cu y sin e recorte.

“E norma di gasto di personal den e protocol ta papia di un caida nominal anual cu e punto di salida e suma di 479 miyon di 2019. Esaki ta inclui e contribucion di dunado di trabao. Na 2021, e gastonan di personal a suma na 418 miyon. Conforme e protocol, na 2022, e gasto mester a baha na maximo 417 miyon. E gasto di personal den Presupuesto 2022 a aumenta cu 15 miyon na 433 miyon.

A inclui 11 miyon pa un reduccion gradual di e recorte di 12.6 porciento. Si mester sigui cu e recorte, e gasto di personal ta yega na 422 miyon, cu ta refleha un reduccion compara cu 2019 pero un aumento compara cu 2021. Cu of sin eliminacion di recorte, CAft ta bisa cu Gobierno mester baha su gasto di personal cu por lo menos 5 miyon florin, de acuerdo cu e BVP, esta e Plan di Maneho Reduccion di Personal.

“A pesar di diferente conseho di CAft, Gobierno di Aruba a duna poco oido na e medidanan di e BVP. Asina a mira con pago di overtime a subi na 2021 compara cu 2020 y tambe den e prome kwartaal di 2022 compara cu e mesun periodo di 2021.”

Recorte Loonbelasting

Desde Presupuesto 2021, CAft a recomenda Minister di Finanzas pa compensa e reduccion di 15 miyon na entrada di loonbelasting cu un aumento di belasting of reduccion di gasto. Minister Maduro a reacciona bisando cu e compensacion lo ta basa riba e entradanan di belasting indirecto ta premira di lo presta miho. “Pero den e reaccion, Minister di Finanzas no a indica si esaki ta trata di un compensacion den forma di un aumento structural di belasting of un ganashi inespera y incidental. Tambe a bisa cu ta tene cuenta cu e reformanan di belasting pero esakinan lo drenta na vigor pa mas trempan na 2023.” CAft ta conclui cu Aruba, desde di a reduci loonbelasting na 2015 no a bin cu medidanan compensativo. CAft ta enfatisa cu mester compensa e reduccion.

“Pa loke ta e ahustacion di e entrada di belasting cu 20 miyon, Gobierno a bisa cu ya no por cobra e suma na 2022 pasobra e sosten tecnico for di Hulanda pa mehora cumplimento di pago a keda posponi. E ta importante cu Aruba yega na nivel di cumplimento di pago mas lihe posibel. Den cuadro di e landdspakket, banda di introduccion di BTW, tambe tin un medida pa mehora cumplimento. Te ainda, e varios actividadnan pa mehora cumplimento cu pago di belasting no a conduci na mas entrada di belasting den Presupuesto. Den luz di e deficit financiero grandi den Presupuesto 2022, e ta crucial pa tuma medidanan crucial, manera mehoracion di cumplimento cu pago di belasting.”

Bon Dia Aruba lo publica e otro detayenan di e argumentonan di CAft pa rechasa proposicion di Presupuesto 2022 den nos siguiente edicion.