Manera a keda publica den nos edicion di diahuebs 9 di mei, diaranson 8 di mei Corte Comun di Husticia a dicta cu Gobierno di Aruba por haci uso di e incinerator na Parkietenbos pa kima cierto tipo di desperdicio toxico.
A traves di su pagina di Facebook minister di Transport, Integridad, Naturalesa y Asunto di Adultonan Mayor, Ursell Arends, a publica e noticia. Manera ta conoci, e incinerator no ta activo pa casi seis luna caba, y esaki, e minister a indica, tabata conforme e deseo di un activista.
Despues cu gobierno a tuma e decision pa cera e dump na Parkietenbos, nan a opta pa sigui haci uso di e incinerator pa kima cierto di tipo di desperdicio yama “desperdicio critico”. E tipo di desperdicio cu ta wordo cataloga como desperdicio critico ta inclui slib cu ta bin di RWZI, carcas di bestianan morto, desperdicio medico y cierto productonan confisca cu conforme ley mester wordo destrui.
Minister Arends a resalta cu Hof a duna instruccion hopi concreto ariba e forma con mester anda cu e incinerator. Esaki ta algo cu e conocido activista, Anouk Balentina, ken a hiba gobierno corte pa e caso en cuestion y na mas di un ocasion pa e diferente problemanan cu no solamente dump na Parkietenbos, pero tambe e incinerator, a resalta tambe.
Reaccionando ariba e publicacion aki, Balentina a publica cu e decision hudicial ta contradeci e afirmacionnan di minister Arends cu e incinerator por funciona sin restriccionnan mas grandi.
“Contrario, corte en realidad a impone rekisitonan estricto cu e pais mester cumpli. E decision aki tambe ta temporal y ta aplicabel te ora cu corte dicta un sentencia firme den e caso di apelacion,” e activista a subraya.
E decision di corte ta indica cu gobierno por usa e incinerator temporalmente, pero esaki ta bin cu condicionnan estricto pa minimalisa e impacto riba salud publico y medio ambiente.
E decision hudicial ta nenga e alegacionnan di minister Ursell Arends cu ta bisa cu e incinerator por opera sin mas limitacion. Contrario, corte a stipula condicionnan estricto cu pais Aruba mester cumpli cune pa por usa e incinerator.
Ademas, manera Balentina a indica den su publicacion ariba su pagina di Facebook, e decision aki ta uno temporal y ta valido te ora cu corte dicta su veredicto final den e caso di apelacion.
Corte a pone limitenan estricto ariba e emicion y capacidad pa controla e riesgonan di e incinerator. Esaki por opera solamente bao di supervicion y monitoreo constante di emisionnan di gas dañino y mester cumpli tambe cu tur e proceduranan di seguridad cu a wordo estableci.
E decision di corte pa e reapertura temporal di e incinerator a bin pa motibo di tur e desperdicio critico cu ta keda acumula cu ta un forma un riesgo directo pa salud publico E desperdicio medico, slib y carcas di bestianan morto a keda acumula desde cu e incinerator a wordo cera, locual, segun corte, a hiba na riesgonan hopi grandi pa medio ambiente y salud.
Pa por usa e incinerator atrobe, e planta mester cumpli cu rekisito- y limitenan estricto pa emision di por ehemplo stof, carbon monoxide y otro gasnan dañino pa salud. No por sobrepasa e capacidad maximo pa evita un sobrecarga y problema. Tambe pais Aruba mester entrega rapportnan detaya regularmente ariba e emisionnan di e incinerator.
Ademas di esaki, dentro di tres luna di tempo, pais Aruba mester establece y comparti cu corte liñanan specifico di operacion di e incinerator. Pa loke ta trata e mantencion y e instruccionnan tecnico, mester duna e personal di e planta instruccionnan specifico tocante con nan mester manipula diferente tipo di desperdicio y con pa mantene e planta.
E condicionnan aki ta rekeri un esfuerso intensivo di DOW como tambe di otro organisacionnan involucra, manera DNM y DVG, entre otro. Cumplimento di e rekisitonan estableci pa corte ta rekeri di solucionnan tecnico avansa y un atencion profesional constantemente.
E decision di corte ta nificia cu practicamente DOW por cuminsa haci uso di e incinerator di nobo desde 8 di mei, fecha di e veredicto aki, teniendo na cuenta e manual di funcionamento di e proveedor y e norma- y disposicionnan cu ta bin hunto cu e hindervergunning, cu excepcion di e disposicion di e carcasnan di bestia morto.
Manera ya caba indica, e decision aki ta wordo aplica y ta valido te ora cu corte dicta sentencia den e caso principal.
Den e caso principal corte ta bay contrata STAB pa asesoramento. E partinan involucra tin e oportunidad di reacciona ariba un concepto di pregunta di STAB, cu ta bay wordo redacta pa e corte comun mes.
E asesoramento di STAB ta termina den zomer 2024. E partinan tin oportunidad tambe di contesta ariba e proyecto di asesoramento aki di STAB. Ta di spera cu e proyecto di asesoramento aki ta inclui un bishita na e planta di incinerator den pleno funcionamento pa e investigacion di e expertonan di STAB, hunto cu e partinan involucra.
Corte ta bay tene na cuenta e conseho di STAB na momento di dicta un sentencia den e caso principal. E minister tambe por inclui e conseho di STAB na momento di tuma un decision nobo den e obhecion di Balentina.
Dependiendo di e procedemento, corte ta bay trata e caso na october di e aña aki of na principio di aña 2025.
