Den e pandemia aki, Aruba a conoce 103 caso positivo di Covid-19. Bon Dia Aruba a haci un investigacion tocante e cifranan cu AZV ta paga pa pashentnan cu ta keda den ICU na Hospital Dr Horacio Oduber.

Esaki tin un costo pa residentenan of local di Afl. 4.771 y pa turista Afl. 6.680. Aruba Visitor Insurance ta cubri maximo solamente 75.000 dollar, loke ta ekivalente pa 136.500 florin. Dialuna ultimo Bon Dia Aruba a puntra minister di Turismo, Salubridad y Deporte, Dangui Oduber durante un conferencia di prensa si un turista mester keda 48 dia den ICU, manera e ultimo pashent, esey lo nifica un costo pa HOH Afl 320.640, sin conta extra gastonan. Ken lo cubri e gastonan aki, HOH, AZV, Pais Aruba of ATA?

Di esaki, Oduber a expresa, cu manera a keda conoci, e pashent en cuestion a keda hopi dia den ICU na hospital. Ta pa e motibo aki cu e companianan di seguro a tuma un averahe di e cantidad di pashent cu tabatin y e cantidad di dianan cu ta cubri. Aruba Visitor Insurance ta e seguro cu turistanan tin cu paga a por bishita Aruba, cu tin un cifra maximo estableci di cobertura di 75.000 dollar y si e persona surpasa e cifra aki, e gastonan lo keda pa pais Aruba.

Tambe a puntra Oduber si den caso cu, manera a sucede dos dia pasa cu dos persona a sali positivo pa Covid-19, mas hende lo keda contagia door di habrimento di frontera. Aruba den caso aki por bay den lockdown un biaha mas? Con e pais lo sobrevivi esey?

Oduber a contesta cu ningun otro pais por sobrevivi un segundo lockdown di un manera facil. Loke nan kier evita ta pa yega na un extremo di e sorto aki. Tambe a bisa cu niun hende por sa si e casonan lo aumenta di manera lihe ora frontera habri pa Merca cu aplicacion di pruebanan pa tur turista y si tur hende lo adapta pa cambia e comportamento. Esey ta nifica cu mas largo por mantene e frontera habri. Nan lo kier tuma e medidanan pa motibo cu esey no ta den nan man so, sino cu ta necesario pa evita e riesgo lo mas tanto posibel. Nan lo informa comunidad na momento cu ta sinti necesario pa por cuminsa tuma medidanan.

Pa e motibo aki lo haci e prueba pa tur turista cu yega. A prepara den Crisis Team diferente escenario. Tin e sistema traffic light cu ta indica e momento pa cuminsa tuma medida, pa motibo cu tin cu evita cu capacidad di cuido lo core riesgo. Esey ta e limitacion cu hopi paisnan na mundo tin, esta cu no tin capacidad den ICU manera cu ta desea.