Gobierno semper a tolera (gedoog) Aruba Ocean Villas, y nunca a ordena pa e kita locual a traha. Asina abogadonan pa Pais Aruba a argumenta den e caso sumario cu Stichting Fundacion Proteccion y Conservacion Commandeursbaai y Vecindario hunto cu Fundacion Parke Nacional Aruba a lanta contra Pais Aruba y desaroyadornan di Aruba Ocean Villas.
Sra. Caster y Sr. Y Kaarsbaan a mustra Huez Verhoeven cu Stichting Fundacion Proteccion y Conservacion Commandeursbaai y Vecindario no por bay na un Huez civil pa pidi Gobierno pa hala aden su permisonan. “E fundacion a busca caminda robez,” a bisa Huez.
Segun Caster y Kaarsbaan, tanto e fundacion recien lanta como FPNA mester por sa cu Aruba Ocean Villas tin permiso. Particularmente pasobra durante tratamento di e peticion pa e ordemaatregel, esta pa para tur actividad di construccion pendiente sentencia den e caso sumario cu a inicia ayera, a mustra cu tin dos permiso di construccion.
A acusa Pais Aruba di ‘vriendjespolitiek,’ nepotismo y clientelismo pasobra kier para e permisonan. Pero pa haci esaki, e demandantenan mester bay Huez Administrativo, esta LAR, y no Huez civil, kende no por huzga legitimidad di permisonan duna na Aruba Ocean Villas.
Pa loke ta paro di e proyecto pa motibo di urgencia pa proteccion na naturalesa, aki no a presenta ningun estudio concreto con e proyecto a causa daño. “No a presenta ningun dato concreto. Riba dje, e area di lama en cuestion y e saliña di cual ta papia no ta cay bao maneho di Fundacion Parke Nacional Aruba,” Caster y Kaarbaan a mustra.
Banda cu Gobierno mes a tolera Aruba Ocean Villas, mester reconoce cu e desaroyadornan a pidi permiso formal desde Maart 2012, y no ta algo cu a inicia awor.
Bon Dia Aruba lo amplia riba e defensa di Pais Aruba y tambe Aruba Ocean Villas, hiba pa mr. Anthony Ruiz, den nos proximo edicion.
