ORANJESTAD – Dialuna mainta minister Dangui Oduber a haci apertura oficial di e tayer di PAHO (Pan American Health Organization) hunto cu DVG (Directie Volksgezondheid) cu ta dirigi riba un plan nacional di prevencion. E tayer tin un duracion di 2 dia caminda cu lo enfoca riba malesanan di NCD’s (non-communicable diseases).

Pa prome biaha den historia di pais Aruba un Plan Nacional di Prevencion di Salud ta wordo traha. Un plan cu enfoke riba e malesanan di NCD’s, un programa pa Aruba cu sosten di PAHO. E meta tras di e plan aki ta pa preveni e malesanan aki pa asina a lo largo por baha gastonan di AZV considerablemente.

Minister Oduber den su presentacion a papia un tiki riba e datonan cu el a ricibi den su encuentro cu e nefrologo na Aruba na aña 2018. Segun e mandatario e datonan a lag’e den shock, esaki debi cu 16.2% di Aruba su poblacion ta sufri di diabetes y esaki ta casi dos biaha mas tanto cu e porcentahe global di 8.3%. Un otro dato cu a capta e minister su atencion ta e datonan di dialyse cu tambe ta a consecuencia di e malesa di diabetes. E mandatario a duna di conoce cu 1 pashent di dialyse ta costa AZV 100 mil florin pa aña, na Aruba actualmente tin 200 pashent y e cifra ta aumenta cu 24 pa 30 pashent pa aña. Aki ta papia di un costo anual pa AZV di 20 miyon florin na dialyse solamente. Mas ainda e cifranan di morto ta mustra cu e causa principal di morto prematuro ta relaciona cu malesanan di NCD’s manera cancer, diabetes, cardiovascular, stroke y respiracion cronico.

E mandatario a splica cu su vision ta pa promove un miho cuido medico, pero tambe un miho calidad di bida pa e poblacion di Aruba. Pa realisa e vision aki ta importante pa bin cu un plan nacional preventivo riba e NCD’s. Pa añanan nos sistema di cuido medico ta inverti den medicamento y e costo di esaki ta keda aumenta mas y mas. Y esaki ta un otro motibo pakico e gobierno aki ta compromete su mes na duna atencion real na e parti preventivo, asina e minister a trece dilanti.

Minister Dangui Oduber a gradici e delegadonan di PAHO, dr. Taraleen Malcolm, dr. Karen Pierre, Ms. Nicola Taylor. Tambe e minister a gradici su departamento cu ta DVG y tur stakeholders cu a atende e tayer. E mandatario a expresa cu e ta sumamente satisfecho di por a cumpli cu un otro punto den e programa di gobernacion.