Pan American Health Organization (PAHO), estableci na Washington, Estadonan Uni, a emiti un advertencia pa continente Americano pa prepara na tempo pa un posible brote di dengue. E enfermedad ta endemico den e region y desde su re-introduccion den añanan 80, a conoce brote ciclico y epidemia cada tres pa cinco aña.
E prome epidemia di dengue cu mas di un miyon caso a sucede den e region na 2010. Tres aña despues, na 2013, e prome epidemia cu mas di dos miyon caso a tuma lugar. Na inicio di 2019, tabatin un aumento odi casom compara cu e mesun periodo di 2018.
Segun dr. Marcos Espinal, director di e departamento di Enfermedad Transmisible y Determinante Ambiental di Salud di PAHO, dengue ta un infecion viral transmiti pa sangura y ta presente riba henter e continente.
“Su complehidad a aumenta durante e añanan debi na varios factor manera crecemento urbano no planifica, problema di awa y sanidad, cambio di clima y den cierto pais, e circulacion simultaneo di tur cuatro tipo di dengue, loke ta aumenta e riesgo di caso y brote serio,” segun Espinal.
Di acuerdo cu e ultimo update epidemiologico di PAHO encuanto dengue, publica dia 22 di februari recien pasa, a reporta 560.586 caso di dengue den henter America, incluyendo 3535 caso severo di dengue y 336 morto. Durante e prome seis siman di 2019 a reporta casi 100.000 caso di dengue, incluyendo 632 caso di dengue severo y 28 morto.
