Pan American Health Organization (PAHO), su director Dr. Carissa F. Etienne a indica durante di un conferencia teni awe na Genve cu e virus Zika ta sprijd actualmente hopi lihe door di e Continente Americano y ta calcula cu pronto e lo ta na henter e continente cu excepcion di Canada y Chile.
Notabel segun e organisacion ta cu apesar cu Zika ta nobo pa hopi pais, paisnan ta respondiendo den forma proactivo cu PAHO/WHO su sosten. Reduccion di e populacion di sangura ta e prevencion mas importante y ta rekeri accion fuerte di gobierno y ciudadano.
Sra. Etienne a agrega, cu trabounan lo continua pa mitiga e menasa di PAHO den paisnan cu ta forma parti di PAHO/WHO.
Desde luna di mei 2015, 22 pais a raporta na PAHO cu nan tin transmission local di Zika. PAHO ta anticipa cu e virus lo ta na tur pais cu tin e sanguranan Aedes, cual ta e sangura responsabel pa transporta e virus. E sangura aki ta presente den henter e region cu excepcion di Canada y Chile.
Dificultad conta casonan
E director ta enfatisa cu e ta dificil pa conta e cantidad di casonan mirando cu ta un den cada 4 persona infecta ta desaroya sintoma. E virus ta detectabel pa solamente algun dia den personanan infecta su sanger y otro testnan pa “antibodies” cu por wordo haci mas despues no ta diferencia Zika, Dengue y Chikungunya for di otro, cual ainda ta un reto pa mediconan.
Link sospecha cu microcefalia
E preocupacion mas grandi cu tin actualemente ta pa e consecuencianan cu e virus por tin pa babynan den barica, ya cu e sintomanan mes di e virus ta hopi leve. Desde october, Brazil a raporta mas di 4000 caso sospecha ci microsefalia den areanan cu circulacion di Zika.Otro complicacionnan tambe a wordo raporta como conexion sospechoso cu Zika, cual ta sindroma “Guillain-Barre” y “autoimmune syndrome”.
Hopi pregunta sin contesta ta keda ainda den e conexionnan entre e malesanan y e virus, e director Sra. Etienne a remarca. A pesar cu ainda nos ta buscando e contestanan aki nos no por tolera e prospecto cu mas y mas baby ta nace cu mal formacion y mas hendenan cu ta core riesgo di paralisis door di Guillain-Barre syndrome, el a termina bisando.
