Recientemente representantenan di PAHO y WHO tabata di bishita na DVG. E bishita aki tabata pa actualisa nan mes di e situacion di HIV/AIDS, otro malesanan transmiti sexualmente y TBC na Aruba. Relaciona cu a bishita aki a ricibi e siguiente relato di DVG.
Un ekipo di Organisacion Pan-Americano di Salud (PAHO) y Organisacion Mundial di Salud (WHO) recientemente a bishita Departamento di Salud Publico (DVG), Seccion di Malesanan Contagioso, pa actualisa nan mes riba e situacion na Aruba di HIV/AIDS y otro enfermedad transmiti sexualmente (STDs) y Tuberculosis. E bishita aki ta forma parti di e plannan di trabou cu Aruba ta haci conhuntamente cu PAHO y cu ta wordo actualisa cada 2 aña. Meta di e bishita ta pa haya sa con Aruba ta para pa loke ta trata e enfermedadnan menciona y unda lo tin mester di apoyo di PAHO pa mehora e servicionan como tambe con pa elimina of controla e enfermedadnan aki den nos comunidad.
Soledad Perez, un experto di PAHO riba HIV/AIDS y otro enfermedad transmiti sexualmente y Tuberculosis cu sede na Venezuela, ta supervisa e trabounan di paisnan miembro di PAHO incluyendo Aruba, Corsou, Sint Maarten y islanan BES.
“Realmente tin un plan di trabou cu nos ta traha cu ne hunto cu e autoridadnan di Aruba. E plan aki ta wordo revisa cada dos aña”, asina e experto di PAHO a splica. Un di e actividadnan riba lista ta e accionnan riba e tema di HIV na Aruba… “y hunto cu HIV tambe e enfermedadnan transmiti sexualmente y tuberculosis. Tin un variedad di actividad cu nos por duna sosten tecnico pa realisa, manera e maneho, e plannan, e normanan, e protocolnan di atencion, e sistema di informacion y mas cu tur cos e potencial di Aruba unda tin un cobertura y acceso universal den salud. E potencial di por revisa e estudionan haci y enfoca riba e datonan cu mas a resalta, asina ki por tin mas impacto riba e proceso di control y posibel eliminacion di e malesanan ya menciona”, asina Soledad Perez a amplia.
Siguiendo riba e tema otro representante di PAHO tambe tabata presente na e reunionnan di orientacion na Seccion di Malesanan Contagioso, Berta Gomez, un experto riba HIV/AIDS y e otro enfermedadnan transmiti sexualmente y Hepatitis cu sede na Bogota, Colombia. El a splica cu PAHO ta afilia cu Ministerio di Salud Publico di Aruba y na PAHO nan kier tin un bista mas comprensivo di HIV/AIDS aki na Aruba. Gomez a trece dilanti: “Con pa responde miho? Con pa atende cu e programanan preventivo? Con por mehora of mira con pa traha cu e pashentnan? Otro pregunta cu a surgi ta si e pashentnan ta hayando e tratamento necesario? Mas importante ainda pa traha pa yega na un posibel eliminacion di e menasa publico y cu Aruba por controla e ‘epidemia’ di tal forma cu ya e no lo ta un peliger pa salud publico.”
Departamento di Salud Publico di Aruba (DVG) regularmente ta ricibi e tipo di bishitanan asina, den un esfuerso pa por siña di e experencia y conocemento di e expertonan internacional, afilia na PAHO y WHO. Di e forma aki Aruba ta keda actualisa su maneho di prevencion riba e tipo di enfermedadnan aki.
