Autoridadnan riba tereno di salud di e islanan di Reino Hulandes den Caribe a reuni cu representante di PAHO, Pan American Health Organization, na Aruba.
Esaki ta informacion for di un relato di gobierno:
Nan a papia tocante di colaboracion cu PAHO y e cooperacion entre e islanan. Tambe nan a discuti puntonan cu ta regarda planificacion di actividadnan relaciona na e prioridadnan aki pa e periodo di 2018/2019.
E reunionnan a sirbi como ocasion pa Jose Moya, representante di PAHO/WHO (World Health Organization) pa Venezuela y e islanan Hulandes den Caribe, cera conoci cu representantenan di e ministerionan di salud di e islanan y intercambia encuanto di temanan di trabao. Dr. Moya ta basa na Venezuela; y e tabata compaña pa dos colega di e oficina di Venezuela.
Enfermedad creciendo
E di dos parti di su bishita a consisti di reunionnan cu Departamento di Salud Publico di Aruba (DESPA) y minister di Salud, Alex Schwengle. Durante di e reunionnan cu DESPA a discuti un cantidad di tema, incluyendo avancenan importante, y retonan comun. A enfoca riba topiconan manera vigilancia epidiomologico; enfermedadnan contagioso; enfermedadnan cronico; hipertension; diabetes y enfermedadnan vascular.
Sr. Moya a splica cu e enfermedadnan aki ta creciendo no solamente na Aruba, pero ta afectando tur pais den e region y mundialmente, y tin e factornan di risico cu mester tene cuenta cu nan, manera e aumento den obesidad. El a subraya cu ta importante pa traha riba nivel di politica publico pa fomenta alimentacion saludabel, mas actividad fisico. El a pone extra enfasis riba e factor “nutricion”, y a bisa cu ta bisto cu e aumento di consumo di cuminda cu no ta saludabel ta creando problemanan di salud.
