E limite maximo general pa tur beneficio hunto, excepto evacuacion medico, pa e cobertura di seguro di salud obligatorio pa tur bishitante, yama ‘SXM Protection Plan’, ta $50mil.
Cobertura pa evacuacion di emergencia na e hospital cualifica mas cercano pa preveni perdida di bida tin un limite maximo di $20mil, tanten cu e pashent no por ricibi tratamento localmente na St. Maarten.
For di dia 10 di januari proximo, St. Maarten lo lansa e cobertura di salud obligatorio pa bishitantenan cu autoridadnan ta bisa ta ‘hopi pagabel’ y ta sigura e turistanan ‘un vakantie relahante y safe’.
Pa motibo di pandemia di Covid-19, St. Maarten kier sigura cu tur bishitante ta adecuadamente protegi y tin proteccion avansa den caso cu nan ta test positivo mientras ta di vakantie na e pais, segun a declara den un comunicado di prensa.
Den caso di hospitalisacion, e gastonan pa trata sintomanan severo di Covid-19 ta inclui pago di specialista, X-ray diagnostico, gasto di laboratorio y di enfermero, y costo di transport specialisa pa un persona infecta cu Covid-19.
Tambe ta cubri un sub-limite maximo di $125 pa dia, pa un maximo di 14 dia, den caso cu un resultado positivo pa Covid-19 y gastonan di Unidad di Cuido Intensivo pa tratamento di un malesa critico causa pa Covid-19. Tambe ta cubri e gasto di consulta di dokter y un maximo di cuatro test di Covid-19 medicamente necesario como outpatient cu un sub-limite di $75 per test. Test ta cubri solamente cu referencia di departamento di Salud di gobierno di St. Maarten. No ta cubri e cuarentena obligatorio pa personanan biahando hunto y esnan cu ta test negativo.
E seguro ta rekeri pa tur ciudadano stranhero cu excepcion di residentenan, bishitantenan cu ta yega y bay e mesun dia, miembronan di tripulacion y pasaheronan den transito/transferencia cu no mester bolbe check nan ekipahe.
