Na Aruba ta biba mas o menos 3000 ex studiante kendenan a studia na Hulanda y cu a haya financiamento di estudio for di Dienst Uitvoering Onderwijs (DUO, antes IB-Groep). Hopi biaha e ex studiantenan aki no ta suficientemente na haltura tocante e posibilidadnan di pago den termino di nan debe di estudio.
Pa e motibo aki mas cu mita di nan ta haya nan confronta cu un deurwaarder. Anteriormente caba Ministerio di Enseñansa, Cultura y Ciencia (OCW) na Hulanda a priminti cu e lo duna mas atencion na e asunto aki. Y esey ta bay sosode awo. DUO ta ofrece na ex studiantenan cu ta confronta problemanan financiero un solucion.
Tur ex studiante cu tin un retraso den pago y di cual DUO tin un adres na Aruba, ta haya pa un solo biaha un areglo di pago na midi. Esaki ta encera cu debedornan por paga segun nan forsa financiero. DUO ta calcula e capacidad financiero aki a base di datonan di nan entrada. Diahuebs dia 19 y dialuna dia 23 di november proximo, for di 7or pa 9or di anochi, empleadonan di DUO ta duna un splicacion riba e areglo aki den auditorio di Colegio EPI na Seroe Blanco.
