Mayoria biaha ta mayornan Latino ta asumi responsabilidad

Bon Dia a combersa cu un cabesante di un scol primario cu ta prefera di keda anonimo. El a conta nos cu na su scol tin varios mayor cu tin añanan sin paga schoolgeld y esaki ta causa cu e muchanan aki no lo por participa den e actividadnan di scol.

E cabesante ta conta Bon Dia cu tin hopi mayor cu no ta cumpli cu nan pago di schoolgeld. Tur material di scol ta bin for di Hulanda, pues e placa cu e mayornan ta paga ta set pa actividad y seguro. Bo tin un Taalboek pa 60 euro, Rekenboek y otro gastonan. E cabesante ta bisa nos cu bo sa haya mayor cu dos of tres yiu, anto nan tin tres aña escolar sin paga. E muchanan ta keda bin scol pasobra no por tene nan na cas. Hopi muchanan ta wordo cubri por medio di Asuntonan Social cu ta cubri 120 florin y mayornan mester paga e diferencia, cual varios tampoco ta paga e diferencia aki. Anto e mayornan aki ta haya un cantidad di placa tur comienso di aña pa cada mucha, pero nan no ta paga.

No ta haci areglo di pago 

“E mayornan cu realmente ta traha duro cu por ehempel trabaonan humilde, nan ta e prome nan cu ta paga y semper cumpli. E Latinonan por ehempel ta bin y haci nan mes responsabel y haci un areglo di pago. Pero tin mayor cu no ta responsabel pero nan ta spera tur cos”, e cabesante ta bisa. Y ta p’esey e bom a explota aña pasa den december segun e cabesante, cu mayornan a rabia na un scol ora un mucha no por a bin kerstdinner.

“Pero no por ta cu 100 mucha ta paga pa e otronan, scol no por carg’e mas.” Ta bay tin yen celebracion na caminda y ora esaki sosode, e scol ta prepara un lista si ta un scol di SKOA por ehempel ta haci un apelacion na cosnan cu lo mester pa cubri e actividad. Pero esaki ta a base di e muchanan cu e paga cual lo costa 65 pa mucha den e caso aki pa henter e aña. “Anto asina nan no lo por participa den actividadnan si mayornan no paga e schoolgeld. Pero e mayornan tin e ultimo telefonnan y semper up to date pero no ta cumpli. Pues esey no por”, e cabesante ta expresa.

No tin motibo valido

Pues si esaki keda acumula, como scol bo no por draai cu actividadnan. Y net e mayornan aki cu no ta cumpli tampoco no ta participa den cualkier fundraising of rifa segun e cabesante. “Unda e responsabilidad di e mayor a keda? Pasobra e maestro mester tin duele pero dicon e mayor mes no tin duele? Si bo pone 15 florin tur luna bo ta paga bo schoolgeld por ehempel. ” E cabesante ta bisa cu algun di e motibonan cu a bini cerca dje ta cu algun mayor por ehempel no tin trabao, pero no tin ningun motibo valido mayoria di biaha riba pa kico no a paga schoolgeld. Tin mayor cu ta djis bay haci un areglo di pago si nan realmente tin un problema financiero pasobra tin un posibilidad pa esaki. No tin un Incasso Bureau cu por bay pa e mayornan aki tampoco segun e cabesante ta subraya pa obliga e mayornan paga. “Nan ta keda bay riba e palabra di contribucion cual e mayornan ta kere cu paga schoolgeld kisas no ta un necesidad of deber mes. Nan ta mira e palabra contribucion kisas manera cu no mester contribui”, e cabesante ta expresa. Nos a puntra e cabesante tambe con ta haci pa comunica cu e mayornan aki, si nan ta bin e reunionnan cu ta wordo organisa na scol.

Pero e mayornan aki cu no ta paga tampoco ta presenta na e reunionnan cu mayornan y docente. Tin mayornan cu no ta ni busca rapport di nan yiunan segun e cabesante ta splica nos.”Esaki ta algo hopi penoso cu ta hasta demotiva e studiantenan cu ni si nan haya un bon cifra e mayornan no ta bin. Ni si bo mama of tata tin interes den bo, ken mas?”

E cabesante ta bisa cu aki un par di siman tin actividad di carnaval na scol y si e muchanan cu no tin schoolgeld paga no paga esaki na tempo, nan no lo por participa. Nan lo mester sinta den klas mientras e actividad ta andando. Cartanan a wordo manda na mayornan pa nan tuma nan tempo pa pasa libremente cerca oficina di SKOA y haci un areglo. Pero mayornan aparentemente no ta worry segun e cabesante. Nos lo ta pendiente cu SKOA tambe pa un reaccion riba e asunto aki den un siguiente publicacion.