Den nos edicion di diasabra ultimo, riba pagina 3 a aparece e articulo cu titulo ‘Gobierno ta carga peso di mas di 8.000 salario’. Den esaki, a publica e tabelnan di IMF di un forma cu no tabata facil pa lesa. Pa esaki redaccion ta pidi nos disculpa. A continuacion, e tabelnan en cuestion hunto cu nan splicacion.
Riba e tabel por a observa un otro cifra cu ta conta mas di e responsabilidadnan grandi cu gobierno tin pa cu pago di salario tur luna. Un bista riba loke IMF a presenta:
Clarificacion:
1): ta encera e cuerponan di Husticia: KPA, CEA, Brandweer, Kustwacht, Arumil, GNC y IASA
2): Ta inclui persona riba VUT, empleado uitzendbureau, y otro personal contrata
3): Ta inclui parlamento, Raad van Advies, DOW, etc.: pago pa cuenta di gobierno
4): Entidad autonomo, manera AZV, SVb: tin propio financiamento
5): Entidad cu ta haya subsidio di salario, manera fundacion
For di e resumen di IMF nos por conclui cu e cantidad di salario cu gobierno ta paga, sea directo o indirectamente, ta ainda mas cu e cantidad di 7.195 cu ministro encarga cu Finanzas a menciona. E cantidad di e ministro ta referi na loke gobierno ta paga directamente di empleado publico, enseñansa publico, enseansa subsidia y e categoria ‘Otro’ cual ta abarca empleado publico riba VUT, persona emplea via uitzendbureau y otro contratadonan. Mas detaye tocante con hunto nan ta conforma 624 persona no ta conoci.
Loke no a bin dilanti ta e sector di organisacion subsidia, pa mayor parti fundacion, cu segun IMF na fin di 2018 tabata representa 858 cupo di trabao. Esakinan no ta salario cu gobierno ta paga directamente, pero si ta parti di e peso structural cu gobierno ta carga. Aunke esey tambe ta relativo, pasobra tin momento cu e grupo aki a ser usa pa baha gasto di gobierno, sin cu esaki a causa critica o turbulencia mayor. E momento tabata na 2017, tempo cu gobierno a corta drasticamente den su aportacion na e sector aki. Den e tabel aki bao nos por mira un resumen di e gastonan den sector subsidia cu ta refleha esaki.
E conclusion ta cu e gastonan di gobierno no ta abarca solamente e Afl. 479 miyon, cu ta e limite cu a acorda cu gobierno di Hulanda, sino hopi mas. E cifra menciona ta cubri e gastonan di salario di personal di e ministerionan, e scolnan publico, y e 624 persona cu den e tabel aki ta cay bao di e categoria ‘Otro’. E cifra di Afl. 605 miyon menciona ariba den e tabel ta e Afl. 479 miyon plus gasto di enseñansa subsidia (Afl. 105 miyon), plus e categoria ‘Otro’.
Sin embargo, no ta contando den esaki e gastonan cu gobierno tin cu e sector subsidia cu no ta enseñansa. No ta dificil pa argumenta con importante esaki ta, y cu no ta gasto cu gobierno por keda sin haci sin mas. Loke si mester tin ta supervision estricto riba strategia, planificacion, gasto haci y responsabilisacion adecua. Loke no mester ripiti ta e suceso di 2017 unda e sector subsidia a paga e cuenta pa por a cera buki e aña ey. Si considera e cuponan aki indispensable, ta trata anto di costo cu pa gobierno ta dificil pa evadi. Ta trata segun IMF di 858 cupo di trabao, cu ta haci e total cu gobierno ta carga: 8.053. Nos ta yega na un total di gasto di Afl. 677 miyon, casi 50% di presupuesto total di Pais Aruba pa 2018.
