ORANJESTAD – Awe mainta a acudi un cantidad grandi di persona na Departamento di Impuesto pa paga number, mirando cu awe lo mester tabata e ultimo dia di pago. Ya caba for di trempan e oficina na Camacuri tabata yen y e parkeo tambe ta full full. 39 mil auto registra no a paga nan number di auto ainda, mayoria di nan ta di categoria A. Solamente un 51% a cumpli na tempo cu e pago di impuesto di vehiculo di motor cu ta culmina awe.
Segun vocero di departamento di belasting Meverlyn Romano a declara, e cifra di cliente cu no a cumpli ainda ta hopi halto. Aunke compara cu aña pasa e incumplimento tabata di 58% y aña aki ta un alrededor di 45% durante e periodo aki.
Mirando cu entrega di plachi a yega laat, nan a prolonga e pago di e belasting cu un luna mas. Sra. Romano a bisa cu a bin cu e decision aki bou autorisacion di minister di finansa y economia, Xiomara Ruiz-Maduro. Te 28 di februari e prolongacion aki lo ta y no lo tin mas prolongacion. Despues di e fecha aki, Polis lo controla severamente.
Entrenta mayan, 1 di februari, nan orario di servicio lo sigui normal na e departamento di belasting.
