E ultimo biaha gobierno a prolonga e ayudo social di FASE – na tur persona cu a perde nan trabao pa consecuencia di e pandemia – tabata te luna di maart venidero.
FASE ta un fondo di solidaridad caminda empleadonan publico, semi-publico y di companianan estatal ta contribui di forma boluntario cu e fondo aki. Pero tin empleadonan di empresa estatal cu pa medio di nan sindicato no ta dispuesto di sigui contribui cu e fondo aki, poniendo den peliger existencia di FASE. Esaki den caso cu gobierno no lo prolonga e ayudo aki debi na falta di fondo, a pesar di e necesidad grandi cu tin di dje.
Segun minister di Asunto Social, Glenbert Croes, nan ta resa pidi Dios pa nan por sigui paga FASE, pasobra e realidad ta cu e necesidad di hopi famia ta dificil. Aña pasa nos no a toca fondo ainda di e problemanan. “E aña aki nos ta bay toca fondo di e problemanan cu ta mas profundo y mas problematico cu aña pasa,” el a bisa. A pesar cu e vacuna ta crea un ambiente di speransa, e situacion ta bira pio prome cu e por bira miho, el a expresa.
Ayera e mandatario den presencia di presidente di e task force di FASE, Sabine de Groot, a bisa cu mester warda kico lo sucede cu e posicion di empleadonan di e sector publico y semi-publico cu no ta dispuesto di sigui contribui cu FASE di forma boluntario. Tambe e mandatario a probecha pa gradici e solidaridad y sacrificio di e trahadonan cu a aporta na e fondo aki pa nan por a paga FASE. “Mientras tanto cu nos ta haya e fondo aki nos ta keda page,” el a bisa.
Mientras tanto e mandatario a sigura cu tin fondo pa gobierno paga FASE. Entre ayera y awe e placa di FASE pa luna di januari mester a drenta den e cuenta di alrededor di 4 mil beneficiario, caminda e biaha aki e mandatario a pidi disculpa pa e tardansa. El a bisa cu gobierno lo sigui percura pa tur hende tin algo di entrada pa e persona y su famia por sobrevivi.
