ORANJESTAD – Diabierna ultimo e musico y co-autor di nos himno nacional, Juan Chabaya “Padu” Lampe a celebra su 99 cumpleaños. E dia ey cantidad di musico y publico en general a bishita Padu su cas. E dia ey a bira un open dag na Beatrixstraat 10 pa comparti e musico y su famia e celebracion aki.

Padu su yiu muhe, Vivian Lampe, a gradici tur esunnan presente y tambe e musiconan cu a bin deleita tur hende cu e obranan musical cu Padu a yega di compone como un legado pa nos cultura. “Asina ta tur aña. Nos no sa ken ta yega!,” el a bisa na Bon Dia Aruba.

E no ta descarta cu lo yega un dia cu oficialmente lo wordo institui e fecha di e gran musico su natalicio como Dia di Padu. “Nos tin Koningsdag, kisas bo tin Padu dag tambe,” asina cu un sonrisa el a declara.

El a bisa cu otro aña ‘cu poder di Dios,’ su tata lo cumpli un siglo di bida. E ta kere cu pa e ocasion special ey, eventualmente e celebracion lo tuma luga ariba plaza Padu Lampe patras di bestuurskantoor. E lo bira full un dia di celebracion cu grupo di baile dunando bida na mas cu 300 pieza musical cu Padu a yega di compone den diferente ritmo durante su exitoso carera como compositor y pianista. Nan lo baila y toca su musica di Padu, ya cu tin basta material –segun Vivian Lampe- pa nan keda sigui celebra henter un dia.

Un proyecto cu e fundacion Padu Lampe ta trahando riba dje ta esun di digitalisa y compila of notula tur e obranan musical di Padu. Nan ta material musical cu Vivian a descubri ora el a bay biba cerca dje. Ora cu el a instala den e cas aki, Vivian a topa cu cantidad di cassette hinca den cas y stof ariba nan. Tur e material valioso aki cu Padu a produci durante su 72 aña bibando na Beatrixstraat 10 ta den man di e fundacion aki y bou e cuido di Archivo Nacional Aruba (ANA).

E ta haya cu e proyecto di digitalisacion aki ainda ta tuma su tempo. El a bisa cu e fundacion aki ya tin casi 4 aña ta trahando riba e proyecto aki. Prome nan mester haci limpi tur e material aki y inventarisa nan pa despues por a cuminsa digitalisa nan. Diferente instancia ta cooperando pa e proyecto aki por sigui cana y yega na feliz termino y finalmente e por bira un realidad

“Nos ta riba un bon caminda, pero tin hopi trabou pa haci ainda,” Vivian a bisa.