Aruba ta den shock desde ayera ora e noticia a drenta cu autoridadnan a haya e curpa di Roshandrick Eugene Frans di 3 aña, dera na Savaneta. E padrastro cu ta deteni, a confesa cu el a mata e mucha y tambe ta envolvi den e morto di su ruman homber Rishandroh (5) cu a fayece diabierna siman pasa na hospital.

Fiscal mayor Hans Klaver a declara ayera cu dialuna anochi e caso a sigui desaroya na momento cu e padrastro di e criaturanan a cuminsa declara unda e mucha perdi tabata ta. Ayera mainta a bay over na haci un investigacion den e bario di Savaneta unda cu l en berdad a topa cu curpa sin bida di Roshandrick. “E investigacion ta canando ainda, tin dos familiar deteni ainda, e wela y mama di e muchanan. E investigacion lo mester mustra kico tur a tuma luga”, sr. Klaver a bisa.

El a sigui comenta cu mas informacion nan no por comparti mientras cu e investigacion ta canando. “Mi ta compronde cu lo tin hopi pregunta, y nos ta di spera cu e investigacion lo por brinda mas contesta.”

E curpa a wordo haya den un buraco coba na Savaneta. Fiscal mayor a laga sa cu tin indicacion con largo caba Roshandrick tabata morto, pero a opta pa no bisa mas tocante esaki ainda. E investigacion tambe lo tin di mustra si tabata e tata so cu tabata envolvi den ambos morto di e muchanan aki segun e fiscal mayor.

‘Falta di comunicacion di instancianan’
Manera cu nos a publica, dialuna tur instancianan social hunto cu minister di Asuntonan Social Glenbert Croes (MEP) a reuni pa cuminsa kibra cabes riba un plan nacional pa enfrenta e problemanan social riba nos isla.

“Nos ta compronde cu hopi biaha ta trece cierto preocupacionnan of kehonan na instancianan, pero cu no tin un follow up di esaki ta pa falta di comunicacion entre instancianan. Pues awor mi ta kere cu por medio di telecomunicacion, apps y tecnologia, cu lo por organisa esaki mas miho cu seguramente lo tin siguimento riba kehonan pa wak si nan tin un base. Y asina protege nos criaturanan”, minister di Husticia Andin Bikker (POR) a declara ayera tambe. El a sigui bisa cu mas cu tur cos, nos ta miembro di tratadonan internacional cu na 2009 caba Nacionnan Uni a trece un rapport cu un lista di preocupacionnan. Caminda cu Hulanda si a cambia leynan riba diferente nivel pa por a cumpli cu e exigencianan di e tratadonan aki. Den 27 inciso 3 di nos Statuut ta para cu Aruba y tur pais den Reino tin obligacion pa cumpli cu tratadonan internacional. Y si e no wordo haci e ora e gobierno di Reino lo tin e derecho pa intermedia. “Nos no kier haya e intervencion aki y nos mester bay wak con mas pronto cu ta posibel pa cumpli cu e tratadonan. Entre otro nos mester bay start e discusion nacional si e dimension di unda maltrato ta cuminsa, y unda basicamente e castigonan educativo ta stop”, e mandatario a splica. Pasobra cu por ehempel na Hulanda ‘e tik educativo cu bo ta bay over na castiga bo yiu fisicamente no ta permisibel mas’. Anto nos como comunidad lo mester bay tambe den e discusion eynan anto evalua pa bay e direccion aki segun minister Bikker. E minister ta papia di lijfstraf cu no ta menciona specifico den nos ley como un acto castigabel.

Circulacion di voicenote riba WhatsApp
Desde ayera un voicenote a cuminsa circula riba WhatsApp unda un persona ta papia tocante algun detaye di e autopsia di e mucha cu a fayece siman pasa, y con esun perdi a wordo haya. E persona ta bisa cu dialuna caba autoridadnan a wak e criatura su curpa dera den un cura di cas pero tabata tin mester permiso di Ministerio Publico pa subi e tereno. Segun e voicenote, autoridadnan lo pronto revela algun detaye di e autopsia di e mucha cu a fayece siman pasa. “Ora boso tende e cos ey, boso ta bay haya rabia,” e persona desconoci a expresa den e voicenote. E persona ta duna detayenan grafico pero Bon Dia a opta pa no menciona nan como cu no por a confirma cu autoridadnan kico ta berdad y tampoco Ministerio Publico ta duna mas informacion na momentonan aki pa no stroba e investigacion cu ainda ta sigui.

Database pa inventarisa riesgonan
Den e proceso di inventarisacion segun minister Bikker, tabata tin señal cu a wordo duna cu tin un tipo di drempelnan innecesario cu a wordo crea den e proceso. Manera e proceso con ta sigui ora ta meld ora un mucha no ta bin scol. “Riba hopi nivel na Aruba nos ta topa cu loke ta conoci manera pseudowetgeving cu exigencianan cu no ta para den ley pero cu ta wordo inventa na nivelnan di departamentonan. Den nos constitucion ta para cu bo tin e derecho pa peticion y tambe pa departamento gubernamental tuma peticionnan of kehonan den tratamento. Anto e ora ey mi ta kere cu ta importante pa kita rekisitonan cu diripiente a wordo inventa na caminda cu no tin base pa evita cu kehonan cu ta wordo treci, no ta haya atencion. Of no por ni wordo entrega y e ora ey bo no tin señalamento. ”

E mandatario a enfatisa cu lo mester bay traha mas cu database y un prioridad ta bay ta pa inventarisa cua ta e risiconan di cual tin criaturanan cu kisas awor akinan lo mester haya atencion inmediatamente. Esaki pa por cuminsa preveni segun minister Bikker cu algo asina por ripiti atrobe.