Pacto entre Cartes y Lugo pa habilita reeleccion presidencial na Paraguay

Frente di izquierda Guasú y partido Colorado ta traha desde un par di siman atras na un proyecto di amienda constitucional, pa asina presenta e modificacion na Senado di Paraguay. Senado a rechasa e proyecto na luna di augustus caba.

E partido Colorado ta purba pa presidente Horacio Cartes por bira un candidato den eleccion presidencial di april di 2018 y partido Frente Guasú ta busca mesun obhetivo pa logra reeligi ex-presidente Fernando Lugo. Awor ningun di dos por ta candidato. Cartes pasobra e ta den ehercicio di presidencia awor y Lugo pasobra e tabata presidente caba.

E postura aki a lanta tension entre hende cu ta apoya y otro cu ta contra e amienda constitucional, como un via pa habilita e proceso di reeleccion presidencial. Segundo vice-presidente di Senado, Julio Cesar Velazquez a habilita e tramite di un proyecto tocante reeleccion. E accion aki a keda califica pa varios legislador como un “golpi parlamentario” pasobra nan ta pensa cu e decision aki el a duna su mes funcion cu ta di e presidente di e camara.

Velasquez, di partido di gobierno, a duna luz berde pa e solicitud di cambio di regla interno di parlamento. Si e modificacion aki keda aproba, anto por discuti e posibilidad di amienda constitucional atrobe y asina aproba e reeleccion. Nan ta busca pa cambia dos articulo di reglamento interno; articulo 41 cu ta evita cu presidente di Senado por para e proyecto aki y articulo 117 cu ta presenta posibilidad di aproba un proyecto cu 23 voto, lagando atras e sistema actual cu ta exigi un minimo di 30 voto en total.

E grupo cu ta rechasa e proceso di amienda ta Partido Liberal. Nan ta bisa cu e proposicion ta inconstitucional y cu e reeleccion por keda aproba via un cambio den constitucion solamente. Segun articulo 290 “no lo usa proceso di amienda, sino reforma, pa tur disposicion cu ta afecta manera di eleccion, composicion, duracion di mandato of atribucion di cualkier poder di estado…”.

Nan a señala cu e proyecto no por drenta di nobo den un discusion formal, te un aña despues di su prome discusion. E proyecto tabata den discusion na luna di augustus cu a pasa.