Fundacion Respaldo tin e tarea awo pa maneha PAAZ. Esaki ta oficial desde 1 di januari 2018. A organisa un evento den cuadro di ‘e momento grandi aki’ dia 8 di januari, caminda personal di PAAZ, Fundacion Respaldo y Hospital tabata presente. Durante e evento aki, hospital a tuma e oportunidad di haci entrega di certificado di reconocemento y gradicimento na tur esunnan cu ta traha cu PAAZ. Esaki ta segun un comunicado oficial cu Bon Dia Aruba a ricibi di Horacio Oduber Hospital (HOH).

“Riba e certificado aki a pone un bunita texto y alabes e añanan di servicio di cada empleado bou di e maneho di Hospital  y cu desde 1 di januari lo sigui haci esaki pero bou maneho di Fundacion Respaldo”, e comunicado ta bisa. Director di Cuido di hospital, sr. Ezzard Cilié tabata presente na e encuentro aki y el a duna di conoce cu nan no por a laga e momenbto aki bay sin para keto y gradici. E momento aki tabata uno hopi emocional pa sr. Ezzard Cilié, pasobra e tabata ex-director di PAAZ y a traha cu hopi di empleadonan di e departamento aki. Varios di e empleadonan di PAAZ tin 20 pa 30 aña den servicio y awo nan ta coopera pa bay den un instituto nobo. “Nan ta e prome cu a wordo yama pa asina yuda duna forma na e instituto nobo aki”, asina sr. Ezzard Cilié a duna di conoce.

Awo cu tin un instituto nobo, specialmente pa psikiatria, esaki ta algo grandi pa Aruba apesar cu hende no ta realisa esey. Hospital ta contento cu e escogencia a cay riba e empleadonan di PAAZ mes, pasobra nan ta e profesionalnan y semper nan a traha den psikiatria y awo den e bachi nobo lo bay traha riba expansion di cuido medico riba tereno di salud mental.

P’e generacion nobo tin varios di nan cu añanan di experiencia, pero hunto cun’e ta atrae hopi profesional pa cumpli cu capacidad humano pa atende e pashentnan. “Den esey nos tin un generacion basta hoben den nan cu ta mira cosnan diferente”, asina el a duna di conoce. Fundacion Respaldo por haci un bon uzo di e hendenan aki pa traha p’e comunidad Arubiano. sr. Ezzard Cilié ta kere den esunnan cu ta traha na PAAZ cu nan ta esunnan cu por yuda pusha e proyecto aki pa miho, pasobra no ta facil pa haci esaki. El a duna palabranan pa asina encurasha na e empleadonan di PAAZ, bisando nan cu nan tin e conocemento pa haci e proyecto aki uno exitoso. “E futuro di salud mental ta den boso man.”