Ronny Irausquin director di Departamento di Progreso Laboral (DPL), a duna di conoce con e proceso ta bay na momento cu dunado di trabou ta bay busca un hende pa yena un vacatura den su compania, como tambe con e departamento ta traha na e momentonan aki door di e pandemia.

Riba e proceso, el a relata cu doño di trabou tin cu entrega y notifica na DPL cu e tin un vacatura y cu ta buscando un hende pa yena e funcion ey den su compania.

El a splica cu e proceso aki ta dura mas o menos tres siman pa controla cu tur documento ta na ordo. Tambe nan ta haci control pa wak si e compania ta existi y na momento cu esey ta cla, e ora ey por duna ‘ok’ pa e vacatura sigui cana y nan lo busca hende pa yena e luga den e compania.

Si acaso ta resulta cu nan no a haya un hende local pa yena e vacatura, e ora ey e vacatura ta cera. “Ningun vacatura cu ta wordo entrega na DPL ta mara na un permiso, loke ta nifica cu e no ta dirigi pa un hende di afo, sino pa hende local cu tin cu yena e luga habri ey”, el a sigura.

Den caso cu no por haya un persona, tin e posibilidad di sigui e proceso pa trece un persona di afo, cu ta keda di parti di e doño di trabou si e kier haci esey y ta mira cu e persona ey por cubri e vacatura. E procedura aki tambe ta tarda tres siman y ora ta cumpli cu tur e rekisito, DPL ta traha riba e peticion.

Na e momentonan aki, door di e situacion di coronavirus nan no ta atende publico den nan oficina sino via afspraak y hopi di e citanan ta bay via e-mail. Pa traha un cita pa entrega un vacatura mester manda un e-mail.

Tin personanan den comunidad cu tin cierto inkietud tocante nan permiso cu mester pasa na DPL cu segun nan, ta tarda hopi tempo pa haya un aprobacion, tocante esaki Irausquin a trece dilanti cu tin momento cu e persona no ta entrega tur e documento cu tin mester.

Tambe, Irausquin a señala cu aworaki nan ta hopi actualisa y no tin mucho retraso riba peticionnan, pero tin casonan cu e persona cu ta apodera di e permiso a bisa cu nan no a haya e peticion ainda. Ora departamento ta busca den sistema, nan ta wak cu e peticion a wordo entrega caba, pa loke nan ta conseha cu den momento ey mester tuma contacto cu e tramitador of dunado di trabou, pa motibo cu eynan tambe ta surgi cierto inconveniente.

Irausquin a detaya cu ora a cuminsa y cu a wordo anuncia cu tur departamento lo cera, nan a keda traha un par di siman mas pa entrega e peticionnan y cu pa via di traha cu e-mail esey ta haci e trabou un tiki dificil pa nan “pasobra nos no tin e e-mail di tur hende”.

Pa e motibo aki, el a informa cu nan ta bezig pa bin cu un sistema na unda nan ta bay exigi pa tur hende manda nan e-mail, pa motibo cu nan kier purba di haci e servicio mas lihe cu ta posibel. Pero te ainda e proceso ey no ta disponibel.

Ademas, el a informa cu ora un permiso ta wordo solicita, e obstaculo cu mas nan ta haya specificamente den temporada aki ta cu e fechanan cu tin den e contract di trabou, entre e doño di trabou y trahado, no ta cuadra.

Igualmente pa via di e situacion di pandemia, Irausquin a menciona cu minister di Labor y Gobierno di Aruba a tuma un decision cu nan a stop e prome permiso pa hende stranhero, loke ta nifica cu “aworaki no tin prome permiso”, el a expresa.

Di loke ta trata e maneho nobo, el a reitera cu esey ta bin conforme cu e situacion cu e isla ta aden, pero te ainda nan no ta cla cu esey. Na e momentonan aki e procedura ta sigui igual.

Irausquin a trece dilanti cu dos of tres siman pasa e departamento a topa cu casonan positivo pa Covid-19 den su personal y door di esey el a haci un peticion pa minister di Labor, pa asina por parti e grupo den dos. Na unda nan ta trahando den oranan di mainta y oranan di merdia, pa di e manera ey evita hopi hende den edificio.

Pa finalisa, Irausquin a comenta cu na e momentonan aki tin masha hopi hende cu a perde nan trabou y cu e departamento mes den su website tin e opcion na unda e personanan por registra pa busca trabou, el a destaca cu esaki ta importante pa motibo cu tin proyectonan na caminda.