Pa sigura su continuidad mester enfrenta un reto hororoso; CMB ta retira 44 empleado

Trahadonan di Caribbean Mercantile Bank a keda confronta un realidad duro. Un total di 44 mester bay pa asina sigura vialibilidad di e instituto bancario. Ayera gerencia di CMB a manda un mensahe pa tur su personal, unda ta informa nan cu mester reduci e grupo cu 44 persona y lo uza diferente forma pa logra esaki.

Den e carta, gerencia a informa cu CMB ta orguyoso di tabatin e privilegio pa a sirbi Aruba pa 58 aña. Durante tur e tempo aki, e banco a traha hopi cerca cu su empleadonan y clientenan, den tempo bon y tempo malo. E fundeshi di e banco ta basa riba relacionnan, y pasobra di esey, e ta particularmente dificil pa e institucion comercial confronta e reto mas grandi cu tin te awor.

“Nos banco a sobrevivi diferente reto, pero den e ultimo añanan nos a mira con cambionan den forma di hiba e industria bancario a acelera mas lihe cu por a anticipa. Cambio den expectativa di clientenan y con nan kier haya servicio, eficiencia operacional pa medio di digitalisacion y awor, lamentablemente maneho memey di un pandemia tabatin un efecto hororoso pa nos tur.

E cambionan den e forma con e negoshi bancario a desaroya ta sigui tin un impacto grandi riba e negoshi y operacion diario di e banco, a sigui bisa den e carta. “E impacto mas dificil cu mester confronta awe ta maneha e costo di exceso di capacidad, e impacto cu e tin riba nos viabilidad a termino largo y e realidad cu ta rekeri retironan di e recursonan mas importante, cu ta nos empleadonan.”

Lo tin un reduccion di 44 miembro di personal cu ta traha full time of equivalente. Lo logra esaki pa medio di un combinacion di vacatura, permiti personanan baha pensioen trempan, combina posicionnan y terminacion basa riba acuerdo mutuo. Despues di consultacion cu FTA a yega na un acuerdo riba un acercamento cu tin e minimo impacto riba empleadonan, y alabes ta sigura e viabilidad a termino largo di e banco.

“Como coleganan, nos kier sigura cu esunnan impacta lo keda trata cu dignidad y respet y nos ta gradici nan pa nan añanan di dedicacion,” gerencia a bisa. “Como dunado di trabou responsabel nos tin un obligacion pa cuida y un responsabilidad na tur empleado, nos clientenan y comunidad pa sigura cu CMB ta keda fuerte y por maneha e crisis actual cu ta haya nos mes aden.

Temponan manera esaki ta inclui tuma decisionnan dificil cu a lo largo lo afecta tur. Aunke cu esaki ta un tarea pisa y duro, e ta necesario pa asina por continua pa duna nos clientenan un nivel di servicio halto y e dependencia cu nan merece.” Segun e banco, e decisionnan cu a tuma ta un di e mas e dificil den e temponan aki “cu ta yena cu reto.”