Sindicato di sector publico SEPPA a dicidi di reacciona riba e solicitud cu minister di Enseñansa, Rudy Lampe a haci den direccion di directiva di Stichting di e scolnan Catolico (SKOA) pa coregi e situacion cu a surgi cu APFA, caminda e trahadonan di e fundacion aki kier a afilia na e fondo di pension aki, sin cu nan tin un status di ambtenaar.

Derecho na pensioen.
Ta asina cu na tur fundacion cu ta wordo subsidia y SKOA ta un di nan, gobierno ta subsidia salarionan, diferente condicionnan secundario igual cu empleado publico. Cu excepcion di p.e. pension. Segun SEPPA, esaki ta un situacion di hopi aña. Gobierno tras di gobierno a ehecuta esaki.

SEPPA a indica cu gobierno semper a hiba e maneho cu e ta subsidia salario a base di un sistema cu e ta controla. Pues, for di momento cu e rangenstelsel pa werksternan a drenta na vigor pa esunnan cu ta labora pa pais Aruba, automaticamente gobierno a pone esaki tambe como e base pa por paga esunnan cu ta labora na fundacionnan. Mescos ta e condicionnan laboral secundario. Pa e sindicato ta inaceptabel pa gobierno awor bin bisa, cu ta subsidia e salario basico, mientras otro condicionnan secundario no.

Ademas, tur e prima(nan), p.e. bashi premie, gelijkbedrag, reparatiepremie tur ta parti di e salario of entrada di e trahado, ya cu tur esakinan en principio lo mester tabata den salario, pero a acorda pa pone nan na banda. Pues, ta incomprendibel pa SEPPA cu awor gobierno a bisa cu ta sigui subsidia salario, pero ta parce cu e premienan cu tambe ta parti di salario, esey si no.

SEPPA ta spera cu e asunto aki ta wordo atendi corectamente pa Conseho di Minister pa evita desasternan pa grupo grandi di trahado. E sindicato ta haya cu e fundacionnan si tin e obligacion como dunado di trabao pa cumpli cu su trahadonan, pero no ta dispone di placa pa por haci esaki. Menos ainda crea dos tipo di trahado den su organisacion, pa un ta gosa di mas beneficio cu e otro. Pa SEPPA esaki no tin nada di haber cu e status di ambtenaar, pero ta un cuestion di principio. Aworaki SEPPA ta referi na e situacion cu a surgi p.e. na SKOA, pero e por pasa den tur fundacionnan aki na Aruba y por crea mas problema .

Condicion laboral.
SEPPA a splica cu na aña 1990 Gobierno a cambia e status di tur arbeider y werkster pa ambtenaar y tambe a keda dicidi cu lo mester traha un sistema di areglo di rango of posicion nobo (rangenstelsel).

SEPPA mester a lucha hopi mes, pa logra kibra loke a keda categorisa tambe como un ‘discriminacion’. Esaki pa motibo cu e protocol di 1997 tabata papia idioma cla. Simplemente mester a traha riba un areglo nobo pa e werksternan. Ta asina cu na 1997 a regla e solamente pa e arbeidernan y e grupo di werksternan mes a keda afo Despues SEPPA a enfrenta e decision di gobierno cu a dicidi cu lo bay pasa e trabaonan aki di limpieza pa sector priva. Atrobe na 2003 a base di un caso na corte a bolbe enfatisa e urgencia pa por yega na un rangenstelsel. Na 2004, porfin gobierno ta cambia su decision y ta haci e werksternan –segun SEPPA- ambtenaar cual ta bolbe habri e caminda pa discuti un rangenstelsel.

E acuerdo cu tin riba e asunto di werksternan, tanto pa esunnan den gobierno como pa e fundacionnan tabata un lucha largo. E asunto di werksternan ta na varios ocasion e sindicato a trece padilanti y ta e asunto cu a conoce un discriminacion masha grandi mes.

Durante añanan, SEPPA a bin ta trece padilanti cu akinan ta trata di un grupo di trahadonan, hende muhenan balente cu a keda perhudica den hopi sentido.

Perhudica pa motibo di decisionnan den pasado. Despues pa falta di decisionnan corecto cu mester a wordo ehecuta. Despues pa falta di un sistema na unda solamente ta wak e placa y no e derecho di e trahado. E sindicato a indica cu pa hopi aña e hende muhenan aki a traha den: incertidumbre, salario abao cu a keda atras pa hopi aña, sin un perspectiva di carera (hasta mester corda e decision di gobierno un tempo pa duna e servicio aki na tercera nan (sector priva). Esaki a bolbe tuma su añanan, ya cu gobierno a keda insisti cu no tin placa. Na 2013, SEPPA despues di un lucha largo a yega na acuerdo cu gobierno riba e Rangenstelsel pa e werksternan. Durante discusionnan semper e sindicato a papia di werksternan den servicio di gobierno, pero tambe esunnan di fundacionnan .

Despues di augustus 2013, e implementacion di e cambionan di salario a conoce algun problemanan tambe. Hasta ora cu a ripara cu e fundacionnan no tabata haya e subsidio corecto pa por ehecuta e rangenstelsel di 2013 pa e werksternan cu ta traha na e fundacionnan. E discusionnan aki tambe e sindicato a hiba cu gobierno y despues esaki a keda corigi di banda di gobierno .