ORANJESTAD – Sindicato SEPPA ta sigui vocifera su preocupacion riba tereno di enseñansa.
E sindicato ta trece dilanti cu apenas un aña pasa, docentenan y tur otro stakeholder tabata ariba bao pa e hecho cu lo kier pasa nos scolnan publico bao di un stichting. Tambe e docentenan a keda busca claridad y no a para keto, y nan a lansa nan bos di protesta. Di inmediato minister di enseñansa a pone tur cos ‘on hold’.
Pero, durante 1 aña largo, docentenan y tur otro cu igualmente ta traha den e mundo di enseñansa a keda den alerta, vigilando tur e pasonan cu ta wordo tuma pa sigui den direccion di un stichting. Pa 2019, diripiente ta bin e noticia cu awor kier bin cu un ‘pilot’ bao di scolnan publico, unda e orario nobo ta bin riba mesa. SEPPA ta haya cu e docente atrobe ta hay’e contra muraya, ora cu nan salario mes ainda ta pega, y esaki pa basta aña. Tampoco no tin mira pa wordo drecha, ya cu no tin placa, segun gobierno.
Tambe SEPPA ta expresa su preocupacion, ya cu grupo di docentenan ta lanta, preocupa pa e cantidad di echonan na pia di trabao, ya cu violencia ta bira mas grandi tur dia bao nos hobennan y tambe na scol. Mas y mas keho ta keda drenta, di hasta violencia contra docentenan, y tin cu keda warda. P’esey SEPPA ta kere cu maneho di enseñansa ta un asunto cu ta keda den discusion.
