Pa sigui explora y reforsa e relacion entre Colombia y Aruba, presidente Ivan Duque a institui un comite binacional, kiermen no unilateral, pa logra yega na cierto areglonan bilateral. Nan lo delinea e temanan pa logra mas cooperacion entre Colombia y Aruba.
Aunke e aspecto di relacion comercial entre ambos pais tin mas peso, ya cu Aruba ta number shete riba e lista di exportacion Colombiano, otro punto hunto cu esun di servicio medico ta esun di turismo den e agenda cu premier Wever-Croes a trata cu presidente Duque.
Recientemente premier Wever-Croes a realisa su biahe pa Colombia pa motibo particular y ariba su propio gastonan, pero el a probecha pa haci algun bishita di trabou. E mandatario a anuncia cu esaki tabata e prome encuentro cu presidente Duque, pero no e ultimo. Considerando cu e mandatario Colombiano lo biaha pa luna di november pa Hulanda pa atende un reunion cu Rey Willem Alexander, Aruba lo probecha e acontecimento aki pa reforsa algun aspecto como partner di Reino Hulandes cu e pais bisiña aki.
