Reunificacion familiar ta un derecho fundamental cu ta hancra bao articulo 8 di Convencion Europeo di Derechonan Humano, unda cu ta garantisa derechonan pa un bida familiar y cu Aruba ta forma parti di dje.

Na Aruba tin hopi matrimonio entre personanan di nacionalidad Hulandes naci na Aruba y personanan di otro nacionalidad, unda cu nan kier forma un hogar y un famia na Aruba. Pero tin cierto rekisito cu personanan tin cu cumpli pa haya permiso di residencia den contexto di reunificacion familiar, entre nan, e rekisito di salud publico.

Redactor di Bon Dia Aruba a investiga y a haya un caso specifico cu a tuma luga for 2019, ora un Hulandes naci na Aruba a casa cu un persona masculino di nacionalidad Dominicano na Republica Dominicana.

Dia 2 di september di 2019, e persona masculino (esposo) a presenta su solicitud na DIMAS pa su prome permiso di residencia temporal na Aruba den marco di reunificacion familiar.

Dos luna despues, na november e persona aki a haya su VTA (voorlopige toelating tot Aruba) unda cu e tin maximo di 30 dia pa acudi na Departamento di Salud Publico despues di su entrada na Aruba pa haci su testnan medico, manera cu ta stipula den Ordenansa Nacional.

Dia 19 di december di 2019 el a drenta Aruba, e persona masculino di nacionalidad Dominicano a haci su testnan medico entre dia 20 di december y 15 di januari di 2020, incluyendo e test di HIV/Aids, VDRL (Syfilis), Hepatitis B y tuberculosis.

Dia 20 di januari e dokter internista-infectologo cu a haya su caso a skirbi un carta, den cual tabata indica cu e persona aki di 43 aña su test a sali positivo pa HIV cu un confirmacion di carga viral. Debi cu no tabatin seguro medico, e dokter no a haci un diagnostico adicional, pero di inmediato e persona a cuminsa un tratamento antiviral. Tambe e persona aki a sali positivo pa Syfilis latente pa un tempo no conoci y cu nunca a ser trata.

Mediante un carta dia 27 di januari di 2020, e dokter a informa DIMAS cu e persona ta HIV positivo y Syfilis positivo, cu ta wordo trata pa un infectologo.

Un declaracion di DBZ (Dienst Besmettelijke Ziekten), cu ta cay bao DVG, dia 6 di februari a informa cu den relacion cu e solicitud di testnan medico ta existi obhecion y un opinion negativo riba e solicitud pa e permiso di residencia permanente na Aruba. Esaki ta motibo di interes publico y orden publico pa concede un permiso di residencia na un stranhero cu ta padece un malesa contagioso, loke ta regarda den Ordenansa Nacional (ley) di Malesanan Contagioso.

25 di februari di 2020, DIMAS oficialmente ta rechasa e solicitud di permiso di residencia permanente den marco di reunificacion familiar. E decision ta establece: “Uw aanvraag is geweigerd op grond van een negatief advies van de afdeling DBZ i.v.m. uw medische keuring t.b.v. DIMAS, waardoor uw toelating op Aruba in algemeen belang ongewenst is”.

Ademas, den otro carta di dia 12 di maart di 2020, e dokter specialista a cargo a skirbi lo siguiente: “E pashent ta bao mi control debi na un infeccion di HIV. E ta cu tratamento desde 15 di januari di 2020 cu terapia antiviral. Den examen di laboratorio di dia 11 di maart di 2020 a indica cu tin un carga di HIV no detectable. Esaki ta nifica cu pa via di e terapia antiviral, ya e virus di HIV no por wordo detecta mas. E conclusion di specialista ta cu e virus HIV ta bon controla cu terapia antiviral y no ta infeccioso mas”.

Den caso aki, e marco huridico ta establece cu den conformidad cu articulo 7 di LTU (Toelating en uitzetting) permiso di residencia temporal ta wordo concedi pa e minister responsabel di stranheria y integracion.

Di mesun manera, articulo 9 inciso 1 letra “a” di LTU ta señala cu un solicitud di permiso di residencia temporal lo por wordo nenga pa e minister responsabel cu migracion pa motibo di orden publico of interes publico, loke ta inclui proteccion di salud publico y di mercado laboral.

Den conformidad cu articulo 1.1 di Ordenansa Nacional di Malesanan Contagioso LIZ (Landsverordening infectieziekten) AB 2019 no.27 ta inclui e malesanan contagioso: HIV/Aids y Syfilis.

Segun loke e Manual di Admision di 2018 ta establece, “E admision ta tuma luga cu e condicion cu e resultadonan di e testnan na Aruba despues di e yegada di e persona ta den orden. Esaki ta nifica cu e persona cu ta suheto na un permiso no mester tin malesanan cronico of contagioso”.

Corte di Prome Instancia ta considera cu pa loke a wordo menciona anteriormente, ora un persona ta suheto na un permiso, si e persona ta padece HIV/Aids y Syfilis no por concede un permiso di permanencia temporal na Aruba.

Den e caso specifico aki, no ta discuti cu e persona ta controla su malesanan infeccioso (HIV/Aids y Syfilis) cu medicamento y tratamento segun loke e carta di specialista a indica, e opinion di Corte ta cu esey no ta relevante. Tambe Corte a menciona cu e hecho cu su pareha cu nacionalidad Hulandes naci na Aruba lo tin cu cambia su bida pa nan establece na Republica Dominicana no ta un obstaculo pa nan continua cu nan bida familiar.

Pa finalisa, e permiso a ser nenga y e pareha su matrimonio no por a wordo registra na Censo. Permiso di reunificacion familiar den casonan di un persona Hulandes naci na Aruba cu un persona stranhero cu ta presenta malesanan contagioso, entre otro, HIV/Aids, Syfilis, Hepatitis B y Tuberculosis no ta tuma luga debi na proteccion di interes publico.